عشقت أنجل

سلسلة من (30حلقة)

الحلقة الأولي

بعض الحكايات يجب ان تسرد يجب ان تروي وحكايتي حكاية انثي حكاية طفلة عشقت أول لنقل أغرمت لحد الجنون لكن قدري أن اعشق من قدره في الحياة قصير (راجلي عشيري حبيبي بو ولدي عبد الرحمان وريث بوه وخليفتو في لاسم شكل والمال )يقولو لخلف مامتش وهذا صحيح لحد اليوم نحس عبدو عايش معايا بروحو وخيالو لنري فيه يكبر كل يوم في عبدو ولدي حكايتي ككل مري تونسية ارملة وحيدة مانيش باش نقول مقطوعة من شجرة لكن صلة الرحم ليوم باتت منتهية ممكن الوقت غير الوقت ممكن قلوب العباد تبدلت باش منظلوموش دنيا ونقولو دنيا تبدلت لكن لكلنا تبدلنا مانيش نذم حتي انا كيفهم الوقت فرقني علي حبابي وصحابي علي اهلي وناسي خرجت فرخة "نكرها لكلمة "اما خرجت صغيرة من دارنا ودورنا موش باش نقول انا منين انا بنت تونس بنت الجنوب والشمال بنت الساحل و الوسط  بنت بنزرت لبنقردان انا بنت الخضراء أب عن جد عشت  في عائلة محافظة كل شئ مايجيش ولايجوز كل شئ محرم وعيب هذي عقليتنا او نقولو اغلبيتنا خرجت للجامعة طالبة وغادي بدات حكاية ملاك اسمي اللي يعنيلي برشا اسم ان شاء الله نكون قدوما نحبش نشكر ونمجد في روحي مع الايام تعرفوني ...مستغربين كيفاه اليوم قررت نحكي نخرج من جلباب لخوف ونخرج  لفي قلبي ساعات بعض القصص تتكتب ومتتحكاش في لعلن قررت نكتب وري شاشة قصة مري حبت وعشقت مرتين لكن في جسدين كيفاش زعمة ينجم لانسان يهيم مرتين  ....أيه هذا لصار عبد رحمان حبيب روح لحد الأن مخلد في قلبي في داخلي أما لصار بعد خمس سنين بدلي كل حياتي بون باش منهولش حياتي تقلبت للباهي اما فما عراقيل وبرشااا زادة وهذا لكل تحت مسمي "لايجوز,عيب,أرملة ,"كيفاش تحب من جديد... صحيح برشا ناس عندهم لحق يقولو بعد لحب لكبير دخلت راجل غريب لحياتها لدارها لدار عبد الرحمان دخل غريب علي ولدي ويتربي عند راجل لأم أما من حقي نعيش من حقي نعاود حياتي موش خيانة ليه أما قلبي دق من جديد "أنا زادة ملول جاتني غريبة وعيب بكيت وترجيت عبدو يسامحني لمجرد تفكير في راجل اعتبرت روحي خنت لكن عبدو زراني في لمنام ايه نعم جا وقالي ملاك عيش حياتك انتي مخنتش أنت حبيت عبدو جديد "من يومها وأنا نخمم زعمة لحلمة صحيحة لكن تعاودت مرتين للي لقيت روحي نغرق ونغرق في حب رجل دخل لحياتي من حيث لا أعلم أحمد عشقي الجديد ...

حياتي تقلبت ولدي عمرو عامين وقتها جاني خبرو قالولي مات عمل أكسيدون جاني في صندوق منحبش نتفكر يومها بكيت قطعت حوايجي ندبت خدي دمي يقتر وكلو يهون علي خاطر محبوب لعين مضنيتش ننسي وكيفاه ننسي عشير عمري كيفاه ننسي راجل حبيتو وتحديت لكون باش نكون ليه عبدو مولود في العاصمة تعرفت عليه في رسترون متاعو اول معرفتو كان عندو مطعم صغير غير محلو مكنش تجيه ناس وتعرفو غير شوي طالبة من يومها عشقت لمطعم ومولا المطعم موش باش نقول الي عبدو ملي راني تضرب فيا لا عبدو كان بزناس شوي تصدقو ايه برشا موش شويا بزناسي علي طرف زيتون قتلو يزيدهم في لبلا من وقتاها كل يوم نمشي وكل يوم يزودلي زيتون في صحني كيف عرسنا قالي كل يوم وين نزود زيتون كان حبك في قلبي يزيد علي قد حبي حبيت نعبرلك بأبسط شئ انتي تحبو (ومن يوم لمات قطعت زيتون كرهتو وحلفت لانكلو بعد عبدو حبيب روح )...قطعت دنيا قطعت ناس نرقد بالحرابش نمشي بالبسي مخليتش طبيب مشيتلوش خيالو بين عينيا ضحكتو وهو في نعشو مننساهاش مات طاهر نظيف مات كان يصلي في الفجر حاضر ومشا كيف كل يوم يخدم لكن مشي ومجاش ولا رجع لجسد وروح طلعت لبارئ جاني بدن بارد صقيع ومن يومها نكره شتاء نكره البرد ونكره فيفري اخيب شهر نعتبرو شهر الموت ولعنة ليا والعائلتي .....عام سلمت في رزقي سلمت في كل شئ واكيد ناس لقاتها فرصة غرفو كيف محبو يقولو جمل كيف يطيح تكثر سكاكينو وأنا كثرت من كل هدب وصوب لقريب ولبعيد ولانقولو لقريب اكثر ضربة لتجي من صديق أقوي من لعدو صدق لقال "أحذر من صديقك ألف مرة وعدوك مرة "قريب يعروني عام عايشة هايمة للي بديت نري في عبدو يكبر رزق يدخلي منو فتات لخير موجود في حياتو عبدو نغرفو بالبالة موش رزق كبير لكن البركة بركة عبدو لحنين لحن علي زوالي ولمحتاج ولقليل يمد وعمرومايقول لا قريب ولا بعيد ...أما اقرب لعونهم طعنونا واستغلوني ايه نعم انا غريبة برانية عليهم حب يخرجوني بيدي علي راسي حبو يفوكولي ولدي ويستولو علي لورث جاتني ضربة القضية ... القضايا جرت بعضهم وين نقول خرجت من قضية تجني لخري لكن تحديت علي خاطر عبدو علي خاطر ولدي وعلي خاطر روحي لو نخرج من داري لشكون نمشي اشكون باش يقبلني لخو ولاخت ولا مرت لبو فقت وليت لبة غولة ناكل ونخبش الي يقربني لفلوس قواتني عليهم وذكاء المراءة وخباثتها ودهائها انا صحيح ملاك لكن ليقرب ضنايا نوالي شيطان واللي يلعب مع حواء ربي مخلقوش غير يتفرج علي عرض ويسمل بسم الله للقبلة ويقول علي ظالين امين ....ومن يومها رجعت رستو كيف عهد عبدو وكبرت فيه وحسنتو وخليتو مطعم عبدولأشهي المؤكولات  ....كبر رستو يوم عن يوم شهرتو كبرت ولا علي طاقين دز لخير علي يدي وليت بفلوسي وكرهبتي كان عنا بلاص صغير فيه 6طيقان كان عبدو وراثو من بوه حسنت فيه وعملتو عصري واخترت شقة لياو لولدي خرجت من داري موش كره لكن كل يوم كنت نتأزم كل يوم صداه في دار خيالو في كل بلاصة ريحتو ضحكتو حوايجو عمري مبدلت شئ في لفيلا لبنيناها حجرة حجرة مع بعضنا علي ذوقنا ومن تصميمنا احنا أما لقدر كان ليه كلمتو عامين عشنا فيها احلي ايامنا واحلي حياتنا واسوء المواقف عشتها فيها خروج عمارة دار وتاجها منجمتش نبقي ونعيش خرجت لبرتمان بعيد علي كل حاجة ممكن تأزمني انا ليوم لوصي لوحيد علي ولدي لو منقفلوش يفكوه ليوم عبدو صغير ولا عمرو 7 سنين ولا رجال حنين وسيس راجل من صغرتو اما نرفوزي كي بوه حاد في طباعو اما مهف وذكي ...هو سندي وذراعي لنتسند عليه ....اما لقدر لعب لعبة من جديد لعبة لحب ودخلني في حلقة خرجني منها القدر مكرها ودخلني مكرها ايضا العشق وحلقاتو التائهة زعمة مع لعشق هذا باش تنفرج حياتي ولا باش نعيش تحت تابو لا يجوز  ارملة ان تفكر بيها حتي .....

ونرجعو ديما لنفس السيناريو عادات وتقاليد أول لنقول عاهات وتقاليد

الحلقة ثانية

ملاك هو اسمي ..عمري 27 سنة كبرت (قول عجزت بلي مر فوق راسي)

حياتي تقلبت من لعمري 22 سنة من يوم لمشي لغالي وتدفن تحت ثري ..أما حياتي طورت  برشا وشخصتي قوات وليت طفلة بقلب مري في لربعين خذيت لحكمة من برشا مواقف تعرضتلهم وكبر مخي وعقلي تفكيري تبدل وليت نعمل علي روحي صاحبة مواقف معادش نخاف ونهاب ممكن لموت علمتني منخافش علمتني الي لخوف كان من ربي لعالي ....قبل كنت في عائلة لمري كان لتطيب وتنظيف ميتعمل عليها في شئ وحتي كيف خرجت للعاصمة متبدلتش نظرتهم برشا بقي لخوف مسيطر عليهم قلة ثيقتهم في الانثي عملتلي نقص حتي في روحي وشخصي وليت انطوائية وحشامة برشا منحبش نخرج ونخالط من لفاك للفوايي لمطعم لي وليت كل يوم سبت واحد نتغدي فيه وغادي بدات حياة ملاك وقت لعرفت راجلي بدات شخصيتي تتبدل وليت نخرج معاه نتفرهد نحوس وصلت لدارنا تراتش كلام ملاك تخرج مع رجال قامت لقيامة وقعدت لكن عبدو مخلاهاش بيا برغم معارضة دارهم يخذ برانية ومعارضة دارنا نخذ براني تحدي وعرسنا عملنا عرس يقول مهرجان عايشني ملكة يدي راسي منهزهاش حتي لماكلة منتفكرش نطيب في دار كملت قريت عندو وحبلت من شهر لول متاع عرسي بولدي بعد 7 شهور جا كعبوري صغرون عبدو ..(لحقيقة كان اسمو أمان الله لكن كيف مات راجلي حبيت ا سمو يبقي يتنادي كل يوم من فمي فبدلتو اوراق واسمو )منطولش عليكم وكيف معرفتو بعد عامين من عرسنا مات لغالي وخلاني وحدي تخيلو مري لا تعبت لا خدمت كنت سهريات جو وشيخات وقعدات شوبينق حجمات نلقي روحي وحدي مسؤولة علي وليد صغير ورزق راجلي لحبو يفوكوه هو ولدي ...وقفت وقفة رجال يزي بلا دلال من ليوم كان لزم نولي مالك موش ملاك وهذاك لكان صفعات لحياة قوة عظمي وعزيمتي خلاتني نكون مري ونص مري وعليها لكلام وليوم وليت باسمي وسمعتي سبقتني لكن بقات ديما صفة راجلي لحقتني وهذا فخر ليا في كل حالات ....

نهار جديد كيف كل يوم نقوم بكري من 5 متاع صباح نحضر فطور امي ولدي امي عايشة معايا بعد مطلقت هيا وبابا وعاود حياتو هيا لقايمة بولدي وهيا لسندتني وقفة في جنبي ...حضرت روحي كيف كل يوم لحقيقة بعد موت لمرحوم معادش مهتمة بروحي بلكل لبسة لخدمة عادية منحبش نتزين ونمكيج ممكن بحكمة اختلاطي برجال ونساء وممكن بعد راجلي معادش حليلي شئ سروال وبلزون وسبادري شعر كعكة كيف كل يوم كان سلكتها نعمل شوي كحل لو كان زهيتلي ....ستة متاع  لزم نكون في رستو ناقف بيدي علي صناع ونخلص سلعة لنهبطها من لقشار كل يوم ...صحيح تعب اما لبدن والف ولفرنك مايدخلش بلاش لزم تشقي وتتعب باش تعيش ...رستو مقسم علي زوز طيقان طاق لول متبدل فيه شئ كيف عهد لمرحوم سوندويتشات بيتزا ملاوي حجات خفاف وطاق ثاني فيه جميع الاطباق مطور حبيت نستغل زون لانا فيها بحكم بجنب فاك وشركات وعلي طريق يعني لخير لمشي للغير علاش مانستغلوش ونجيبوه لمكتوبنا وهذا لصار ليوم مطعم من احسن لمطاعم ...

انا خدمتي نشد لكاسة وساعات كيف يغيب حد نعوضو ونعاون بلي نقدر هوني عايلة كبيرة يخدموا كثر من 10 خدامة وحمدلله لخير بزايد ..من صباح تكثر لخدمة لزم نقفلها صعيب ترتاح شوية ...والا توثق في حد اصلا تعلمت منثق كان في روحي ....

حلقة الثالثة

_قام يتكسل نوم معبي عينيه حتي هو من سهرة لبارح رقد مع لفجاري ...احمد استاذ جامعي كان يقري في فرنسا ورجع سنة لتونس ..ليه جمعتين من لجا ..مزال مركحش امورو جا من يومين من لبلاد خذا بيت في أوتال حتي يلوج علي لكراء ليوم لزم يمشي لفاك ...لبس حوايجو وخرج فادد من ربي ميعجبوش لعجب ..خذا تاكسي ...وهو يتأفف كانش راهي كرهبتو معا ه اما تعطلت في ديوانة وين يمشي يرجعوه هز لورقة حط لورقة عرف روحو باش يكره عيشتو تونس بعد ثورة تبدلت برشا لو موش امو نهار كامل تزن عليه في وليدي ارجع وخوذ من بلادك نحب نتهني عليك ارجع لبلادك علي اقل كل شهر نراك بعد زن سنين رجع اصلا يزيه من لغربة ...احمد عمرو 34 سنة رجل رزين وعاقل اما مهف وذكي منظم ومسنتر برشا (تنجم تقولو قانونجي كل شئ عندو يتحسب بالملي )اه نسيت مقتلكمش مع نظام يحب الاناقة يعشق لبسة لبرفيم لمناقل ولينتات يؤمن بجمال لخارجي يحب لمظهر يكون مزيان ميحبش يخرج من غير مايكون متأنق ومايكونش متشيك ....الوهرة متسمية عليه زين زين عرب اسمر حرجو في الاكحل طويل وبدن سبور عندو لزم وضروري ...

من عامين مرجعتش لتونس تبدلت برشا فوضي في كل بلاصة تاكسي متقف كان متشيحلك ريقك وزيد يتشرط عليك من فوق مهبطت من تاكسي كان ماقريب نفريكو من بعضو علي معقدني خلصتو وهبطت زون هذي منعرفهاش بلقدا ليا سنين مزرتهاش...تاكسيستي قالي لفاك  في اخر دورة مندخلش لداخل ...مشيت علي ساقي وانا نطلب في عشيري وصاحبي ايمن هو زادة استاذ هوني ف لفاك قرينا مع بعضنا وقرينا في فرنسا مع بعضنا اما رجع وعرس وعندو وليد تحفون دخلت للفاك يقول طالب مانيش دال شئ سئلت مجموعة من طلبة علي الادارة وين ...دخلت نلقي قاعة الاساتذة سلمت عليهم وعرفتهم علي روحي ...لحق فرحو بيا دخلت لبيرو لمدير سلم عليا ورحب بيا وعطاني جدول متاعي خذيتو وانا نشوف في الايام لباش نقري بيهم وقداه من ساعة في جمعة ...أول ساعتين نقريهم بعد ساعة من تو وانا جاي لاورقة لا ستيلو في يدي اصلا جاي نتعرف موش نقري اي عملت علي ربي ودخلت بعد مخذيت فكرة من بعض زملائي علي طريقة ليقرو بيها ...عديت معاهم ساعة ونص بين تعارف وفهمتهم في طريقة لباش نقري بيها ...خرجت نزرب بعد مقالي ايمن الي هو يستني فيا في الادارة اول مشفتو خذيتو بالاحضان صاحبي لغول والله ليك وحشة

_ احمد يالخو وينك هكا تجي من جمعتين لا طول لاتقول خويا

_ مك تعرف ايمن ملي روحت طول للولدة تاعبة شوي

_ شبيك ياخي جاي تو لقراية بدات ليها جمعة

_ الله غالب ايمون شنوة باش تولي مسؤول تو

_ انا ديما مسؤول نعرفك منظم في لعادة

_ فادد لحقيقة رجعتني لهوني فرعستني مزلت مركحتش اموري

_ وين ساكن كريت

_ لا كريت لاوالو جيت من يومين ساكن في اوتال

_ ساكن في اوتال ودار صاحبك محلولة

_ شنوة مك تعرفني خرجتي ياسر وقعدتني نحب نكون وحدي

_ علي اقل طل تكلم قول راني هوني تتعشي معانا علي اقل

_ اكيد تو نتعشي ونتغذي للي تفذو اصل

_ اسمعني عندي حبيبت لمدام عندها برتمنات هاي في زون هذي وقريبة برشا كان تحب نشوفها نلقوش عندها برتمان فاضي برغم صعيب شوي تعرف قريبة للفاك وزيد بزهر عندها رستو شئ كبير مكلة وعندهم خدمت ديلفاري يجيك لدار ادعي ربي يكون عندك زهر

_ شوفلي ايمن تعمل مزية خليني نركح اموري

_ ملا هاي نمشو نتغدو ومنها نحكي معاها

_ باهي يالخو مشات معاك

حلقة الرابعة

خدمة في جرت بعضها وزيد بزهر ليوم صانع مجاش دخلت مع لولاد علي اقل نعبي سوندويتشات ...وجهي مغصور وتاعبة لكن البسمة ديما في لفم ...

_ اهلين بملاك سافا

_ اهلا ايمون سافا دقيت علي يدو (يقول بربو نخزر لرجل لمعاه هبط لينات شوي خزرلي ورجعها يعوج في فمو مهتميتش بيه ورجعت لايمن )سافا كيف لعادة سندويتش شورما

_ لا ليوم معايا ضيف وحط يدو علي كتف لمعاه ...هذا صاحبي احمد يقري معايا في لفاك ...نعبي في سندويتشات ونخزرلو وجهو جامد يقول عبد ميت صبر ظاهر دعوة وضربها في روحو

تشرفنا بيه

_ اه ملا افرحنا بيه

_ ملا لفوق اايمن هوني مك تعرف كان لسوندويتش ولبلا لخفافي

_ يلا نعرف اما حابب ندلل عليك نحب بلا سبيسيال ليا انا وبوحميد وراطا مشوية سلايط وفريت ركحلنا امورنا اه وعبيلو بزايد زيتون بوحميد يحبو ونحب نفطرو لبري علي طريق منحبش لخنقة لفوق

_ احسبو عندك ايمون تدلل خويا ...مركزتش معاه طلبت باش يحضرلهم لبلا وبزايد زيتون كيف مطلبو ..ورجعت نخدم بين لكاسة ولكونتوار

_تعرف ياسر بنين لحوت

_ صدقني احمد اعز ماتكل هوني وشعندك ريت عندهم صيفة مقرونة بالفروي دومار تاكل صوباعك وراها

_ ايا باهي علي اقل قريبة للفاك ايه كلم مولتها علي دار

_ اي خلي تخف شوي لخدمة ها كريتها وحلة

_ وين ريتها

_ لكنت نحكي معاها

_ هذيكا قالها بتهكم

_ ايه هذيكا شبيها

_ تقول زوفري موش انثي ريتها كيفاه سلمت

_ هاكي مري بعشرة رجال ديقورديا ورجلة وحنينة غير متعرفهاش متشوفهاش هككا اما صدقني مخها موش نرمال

_ باش نخطبها انا تي كلمها برك

_ كمل تغدي تو نقلها كي نجي نخلص

_ باهي

**

اي ايمن صحة

_ يعيشك ملاك قداه

خذيت بلا حوت وملازمو يطلع ب*** نري في صاحبو مد لفلوس وايمن يحلف عليه

_ شنوة احمد انا لمستدعيك راهو

_ بينتناش صاحبي خوك وو مرة عندك ومرة عندي

_ رجعتلو لباقي وانا متمنية نري عينيه مفهمتش علاش (ههه نطلعش نبزناس )

_ ملاك فاضية

_ منين لفضوي هاك تري ..أما نفضي روحي علي خاطر خويا

_ ياخو بخطرك ملاك صاحبي يلوج علي كراء ولزم اكيد قلت مزلش برتمانت فارغين

_ صعيب عوجت فمي ...بففف لكلهم مكرين لحقيقة اما

_ اما شنوة جوبها احمد لكان مركز معاها

_ خزرت لايمن ...تعرفو لبرتمان لقدام داري متاع طبيبة

_ ايه شبيها

_ يظهرلي باش تنقل رجعا لبلادها هيا قالتلي من مدة اما لتو مرجعتليش خبر صحيح باش تنقل ولا

_ بربي كلمها قالها ايمن

_ باهي لحظة ....كلمتها قاتلي الي هيا باش تخرج يومين اخرين

_ ياسيدي عندك زهر ..باش تخرج يومين اخرين اما راهو برتمان كبير هذا متاع عايلة موش متاع شخص وحد

_ موش مشكل لمهم دار حتي يحلها ربي قالها احمد وهو يخزر لايمن

_ باهي ملا يومين اخرين تجي تراه شقولك

_ منجمش ليوم نحب نركح اموري مدام منقريش وزيد نشوف شناقص في لبرتمان نشريه

_ ملاك ماني خوك هذا راهو عشير عمري كلمها لكارية نعملو طلة خفيفة

_ باهي ايمن نبدل دبشي ونجي معاكم عطيت لكاسة لشكون مشيت لبست دبشي وخرجت معاهم

_ قريب لبلاص من هوني من غير كرهبة ايجو تبعوني

_ كنت نمشي قدامهم كل دقيقة نسلم علي حد حومتي ناس لكل نعرفهم وانا اجتماعية برشا ...

_ملي خرجنا من رستو كانت تمشي قدامي كيف نحت تيني لخدمة بدنها بان ستيلها تحفون اما مخبي وري شوالق متاع عزري اكثر منكره لمري لمسترجلة وشئ هذا ظاهر فيها حتي في مشيتها لا وكل دقيقة صوتها عالي في شارع شعب لكل تسلم عليه شئ يفدد باش نكري عند مري هكا ..وصلنا لبلاص عصري ومضخم برشا طلعنا لطاق ثاني فما زوز برتمنات بقات دق محللها حد طلبت كيف كيف مهز حد

_ شنوة ملاك موش كنت تكلم فيها

_ ايه قتلي في دار لحظة هاي تطلب (قاتلي خرجت للعطار بقضية شوية وترجع )

_ ايجا ادخلو للبرتمان مدام جات تفضلو

_ ادخل احمد

_ خلينا هوني مايجيش لمري وحدها

_ امها هوني معاها ادخل ياراجل

_ دخلت مجبر منحبش ندخل لديار ناس منعرفهمش اما اول مدخلت بهرني شئ لنري فيه اثاث مضخم ذوق رائع الوان لمختارة بذوق كبير لوحات علي لحيط ولشدني صور هيا مستحيل معرسة بقيت نقول في قلبي اما لفي صورة تقول موش نفس لمري لقدامي في صورة مري مضخمة زين وعين صوت صغير يقول ماما خلاني ندور ورايا كانت محملا وليد تبوس فيه نري في ايمن قدم وباسو وبقي يسلم عليه

_ عبدو هذا عمك احمد

_ عسلامة تونتون احمد

_ عسلامة مديتلو يدي وبستو محلاه فيه شبه  منها

_اقعدو شبيكم واقفين

_ لا مدام ملاك كلم لكراية كان جات

_ كيف تجي تكلمني اقعدو ا يمن اقعد مكش براني

_دخلت حطيت سنية لوزام ضيافة ...مديتلهم وقعدت بحذاهم

_ اه ايمن ويني عايدة

_ لباس عليها كيف متعرفها لخدمة وزيد صغرون مشيحلها ريقها

_ ربي يعاونها

_ وانتي اش عاملة سافا

_ حمدلله (تنهدت)

_ شبيك متقوليش لتو يقلقو فيك

_ محسوب مبطلين كيف لعادة

_ متخافش ربي كبير وخزر لتصويرة جبدها الله يرحمو كان راجل وسيد رجال

_ الله يرحموا يمن خلا بلاصة كبيرة علينا هك تري فيها يقول عزري بعدو

_ مسالش ملاك لمهم رزقك ورزق ولدك مايكلوش صحاح عبدرحمان خلا للات نساء وانتي قداها

_ يعيشك ياايمن اه تيان ها ي تطلب فيا خلينا نشوفو دار

_ من لحظة لقال ايمن الي رجلها ميت قداه غضتني حسيت بلي عانتو ظاهرة صغيرة وباينة هموم شايلتها في قلبها منعرفش علاش ولاول مرة نهتم بحكاية حد

_ دخلت للبرتمان عجبتني برشا صورت لبيوت باش نختار لاثاث ..دخلت توريلي في بيت نوم كانت بجنبي عندها ريحة سبيسيال ريحة منعرفش بشكون تفكرني وقت لجيت باش نخرج مريولها لصق في منقالتي كانت قريبة ليا برشا وقت لهودت باش تقطع لخيط لوحل في لنقالة شعرها ريحتو نعوشتني شعرها مارون غامق يشبها للاسود حرير مكنش منظم شئ لخلاني مغزل كيفاه جمال شعر كيف هكا يتلم كيف مجا وقفت قريبة ليا سامحني سي احمد متجرحتش لمنقلة

_ لباس اسمي خرج من فمها بغنة سبيسال كأني اول مرة نسمعها ....روحت وانا في مخي حكايتها بعد مسمعتها من فم صاحبي قداه غضتني قداه كبرت في عيني مري مناضلة وقوية وانا انحني واضع القبعة امام هانوع القوي والقليل من نساء

حلقة الخامسة  

يومين تعداو بين خدمة ودار حياتي روتين في روتين لنقوم عليه نصبح عليه تنجم تقولو تعودت كيف كل صباح نقوم نحضر لفطور نفطر ونخرج علي لفجاري يتعدي نهاري بين صياح وحس وجوجمة للي نروح راسي باش يتفلق روحت لعشية رميت روحي فوق لفرش راقدة ميتة بتعب منعرفش قداه خذاتني عيني للي نسمع في حس  قومني فقت نتأفف خرجت نتكرم نلقي امي ناصبة لقعدة وتترشف في تاي صحة امي ولا نشهدلك

_ ايجا بنيتي اشرب كويس منعنع

_ ا ه امي راسي باش يطرش وزيد لحس هبلني

_ يظهرلي لكراي جديد جاب دبشو

_ يا نسيت حقا ليوم يجيب دبشو قال ...زعمة نخرج نباركلو ولا شنعمل

_ ووه بنيتي فاش قام كراي كيف لكرايا لكل (مدتلي كاس تاي وبقات تخزرلي كيفاه دخلت بعضي)

_ قلت لحق امي حطيت راسي فحجرها وبقيت نكونكتي ..

**

ليوم من لقمت وانا اكحدي بين شريان فروشات وملازم دار لحق ايمن ومرتو مخلونيش عاونوني ..مرت ايمن قامت بالواجب ومقصرتش مخلاتنيش نلمس حاجة جيت نلقي كل شئ مريقل ومرتب حتي حوايجي عملتهم في دريسنغ

_ يعيشك ياعايدة وراس اختي حشمتي علي روحي

_ ماتقولش ها لكلام اختك راني

_ ربي يستر وراسك كيف اختي واعز

ايمن خليني نسلم علي ملاك ليا مديدة مزرتهاش

_ باهي متبطاش

_ بقيت انا وايمن نحكو ونفدلكو كان باب لبرتمان محلول كنت نري فيها وقت لخرجت تسلم علي عايدة أول مرة نري شعرها محلول مغطي كتافها لبسا سرفاتمون متاع دار تقول طفلة صغيرة

_ عايدة ادخل والله فرحت كيف ريتك

_ والله مزروبة مرة اخري نجي قلت مدام وصلت نسلم عليك

_ هكا من لباب بربي يجي منو

_ مسالش مرة اخري والله ولدي وحدو خليتو عند امي

_ طل بربي نهار نعملو قعدة

_ اكيد منوصيكش علي احمد

_ تهني (هزيت عيني نلقاه جاي هو ايمن قدمت سلمت عليهم )

_مبروك سي احمد

_ يعيشك مدام ملاك

_ ايمون سافا خويا

_ لباس ملوكة قلي شعاملة ويني لحاجة

_ لباس علاها ادخلو زوز بربي

_ ان شاء الله في لخير قالها احمد

_ يظهرلي لوالدة طيب في تاي

_ كأنك حاضر ادخل نعرفك تموت علي كويس منعنع..بزلوز  

_ اه باش ندخل مفيشو كلام

_ ادخل عايدة مك تعرفوا يمن ليلة سهرة لصباح

_ ووه يملاك وخيتي ولدي راهو عامل حالة باامي

_ محسوب تو نكملوها ونشوفوه ادخل دخلتها وبقيت نخزر لاجمد لقالي سلام

_ تفضل سي احمد علاش مروح ادخل جيران راهو

_ لا يعيشك مدام ملاك مرة اخري

_ لا والله مصارها انتي منقل جديد ليوم عشاك عنا ادخل هاو ايمن هوني وتعرف علي لوالدة

_ يعيشك (دخلت بعد محلفت منجمتش نحنثها سلمت علي امها مري ظاهرة طيبة وكريمة فرحت بيا قد دنيا )

_ اول مرة نري عبدو ولدي يلعب مع راجل غريب احمد راه مرة برك... ظاهر حبك عبدو موش عوايديو يقبل يلعب مع اي حد

_ حتي هو يتحب تبارك الله عليه

_ يعيشك لعاقبة ليك ...

_ طلبت لعشا من رستو تعشينا وسهرنا شوي وروحو وقت لجا مروح قتلو ...

_ سي احمد تحتاج حاجة قولي

_ يعيشك ويعطيك صحة علي عشا

_ علي خير

روحت لداري جديدة تكيت في فرشي لزم نرقد بكري صباح نخدم ليلةكاملة صورتها بين عينيا مفهمتش علاش نخمم فيها وفي كلامها صوتها ضحكتها مشيتها غرست راسي في لمخدة باش نطرد ها صورة لفي بالي مصدوم من روحي كيفاه نخمم في مري وبصغيرها شئ لا يقبلو لا عقلي لا عايلتي .تأففت قمت شعلت سيقار وخرجت للبلكون نخزر لنجوم تكيت علي بريار وبقيت نفكر في ماضي قريب ..

..

 حلقة السادسة

فقت مع ستة ليا ايام معلمتش فوتينق لبست حوايج سبور وخرجت عملت جرية باش تنعوشني ...شمس بدات تطلع رجعت يادوب ندوش ونمشي نجيب كرهبتي ليوم ...طالع في دروج ريحت برفان موش غريبة دخلت لخشمي هزيت عيني نلقاها هابطة تزرب مفاتح في يدها حسيتها دخلة بعضها وكانها مراتنيش صباح لخير مدام ملاك

_ لوقت فاتني موش عوايدي نوخر لبارح ليلة كاملة نخمم في حجات لا يقبلها لاعقل لادين وكمل صوتو خلاني ندخل بعضي يعني ليلة كاملة نخمم فيه ونزيد نتصبح عليه ...صباح لخير سي احمدلباس (بقيت مركزة مع حوايجو ظاهر كان يعمل في فوتينق ناس عايشة موش كي همي مدفونة بالحياة )

_ لباس حمدلله ان شاء الله نهارك زين

_ يعيشك نهارك ازين وهبطت نزرب موش حبة نتلفت برغم قلبي لكلاني باش نخزرلو مرة اخري ...

من يوم لجيت  اول يوم يتعدالي نهار زين لكلو خير لكرهبة خرجتها من غير تعطيل ...تقابلت مع برشا صحاب قدم ...حتي سوايع لقرايةتعدو موش مملين نهار خفيف مع 3 متاع لعشية خرجت انا وايمن باش نتغدو هكا وين كملنا ...دخلنا لرستو مكنش معبي ..برشا كانت قاعدة قدام لكاسة تترشف في قهوة وغارسة راسها في تلفون ....

_ سلام

_ اهلا ايمن اهلا احمد سافا بقيت نخزرلو محلاه ومشبو حمحمت علي تخريف لنخرف فيه ...

_ شنوة تكلو

_ انا سندويتش سكالوب وشوف احمد

_ كيفك هات سندويتش وبزايد زيتون كيف لعادة وتبسم

_ ذبت في بلاصتي (اااااه طحت بلكاوو يظهرلي انا لوليت نبزنس سبحان الله وكأن الماضي يعيد نفسه نعبي في سندويتشات بيدي حتي من صانع لمعايا تصدم فيا كيف قتلو خلي انا نحب نريقلهم ...نفس سيناريو من 7 سنين باقي يتعاود وكأنو عبدو انا واحمد ملاك سبحان الله حتي هو عاشق لزيتون لحلفت عليه منحطوش في فمي من سنين )

هزيت لبلا بيدي مديت لايمن بلا براسك فيه 10 كعبات زيتون واحمد كدس تي قول كيلو

_ صحة سي احمد انا منشبهش يجي عشرة كعبات بالحسب وانتي يالخو تحطتلك شجرة زيتون

_ تبسم احمد اصلا تصدم كيفاه لقا لبلا معبي نصو زيتون

_ تبسمت تبسيمة صفراء بدني عرق بكلو ملا حشمة قداشني دغفة ...

مقصدتش هههه ايمن وخي لحظة نزيدلك

_ لا خلي هاو بزايد مرسي مدام ملاك (خزرلي خزرة تقتل )

_ خزرت وانا قلبي يدق بقوة صحة نخليكم ...رجعت شديت كرسيا وكل مرة نخطف نظرة نراه فيه يضحك ويفدلك صوت ضحكهم وصلني استغفرت ربي علي لنعمل فيه حسيت روحي خنت عبدو في دارو رستو ملكو وانا نخزر لراجل غيرو عطيت لكاسة لواحد من لخدامة ...وخرجت للجبانة ليا ايام مزرتوش عديت لعشية معا ه وانا نبكي علي لعملتو طلبت سماح وروحت 5 سنين من يوم لمشا وانا عايشة علي صورتو واسمو في دار قلبي لحد اليوم يدق ليه قصتنا صحيح صغيرة ومدامتش سنين لكن قلبي معبي حب واحترام ليه ..روحت نجر في ساقي سوقان جيت نحل في باب دار نسمع في باب برتمانو تسكر ورايا ...نسمع فيه قالي سلام

_ غمضت عيني وتلفت (بقيت نخزر حط لحطة برفانتوواصلة لعندي هو ملي ريتو متأنق اما ليوم علي غير لعادة )سلام سي احمد

_ لباس (بقيت مركز مع عينيها ظاهر باكية وجها اصفر شعرها داخل بعضو باينة موش قد بعضها منعرفش علاش قلبي توغوغش اصلا اشدخلني باش نقدم ونسئلها (من لحظة لكنت في رستو وقمنا نخلصو وملقينهاش ستغربت وزيد صانع قال خرجت حتي من ايمن استغرب قال موش عوايدها )لباس مدام ملا ك حاسك مكش قد بعضك

_ لا لباس يعيشك شوي تعب وبري (هبطت عيني منحبش نخزرلو )نخليك ليلتك زينة

_ باهي ليلتك زينة ...هزيت كرهبتي ومشيت لنايت كلوب مكنش بعيد علي منطقة لنسكن فيها كبشو فيا لولاد باش نسهر معاهم غدوة منقريش صباح كان لعشية ...سهرية كاملة عدينها ضحك وفدلكة وفي اخر ليل واحد من صحابي كبش باش يروح بوحدة وطلب سوعتين في برتمان حشمت منجمتش نقولو لا ...روح معايا في لكرهبة ...كنت فادد لتو بصنعتو لقديمة ومتبدلش ...وقت لهبطت قالي درجين يمشي يقضي لزوم سهرة ويجي عطيتو لكرهبة وهبطت معايا تتبختر تقول ابليس قداش نفد من ها نوع من نساء اصلا منعتبرهمش نساء ...

حلقة سابعة

_ ملي تعشيت شديت بيتي محبش يجيني نوم مفهمتش علاش بقيت نخمم فيه قد ملهيت روحي وشئ كل شوي نطل كيف نسمع كرهبة حبست... نص ليل سمعت صوت كرهبة خرجت نجري نطل لكن ياريت مطليت ياريتني ماريت جايب معاه مزة تقول قنبلة كل شئ علي بري باينة خبرة ...بلعت ريقي ورجعت شديت فرشي مصدومة يظهر عاقل موش متاع شئ هذا قداه كرهتو واستحقرتو من غدوة نبه عليك بلاصي محترم وشئ هذا مايليقش بيه بت بغصة في قلبي ..قول مرقدتش مشيت للخدمة نغزل صحت علي خدامة الف مرة علي لا شئ لكلهم بقين مستغربين فيا عمرهم مراوني هكا ...من ربي فدة منو زاد ريتو جاي اكيد جاي يتغدي منحبش نراه خليت لكاسة عند شكون ودخلت لداخل لكويزين وين يطيبو خليه يكمل غداه لانتكلاتا عليه ...بقيت نعاون فيهم نقص في سلايط حبيت نفرغ دم قلبي في تقطيع ..نقطع وكأني نقطع فيه ...من غير منشلق نضرب يدي بسكينة دمي جا ينز ...لخدامة لكل تحيرو كبشو يهزوني علي اقل للفارمسي لبجنبنا باش نظف جرح ...خرجت لفة يدي في سرفيات تعبات بدم ...وقت لخرجت ريتو يخلص كيف راني قدم مفجوع

_ لباس ملاك شبيها يدك

_ تجرحت جوبتو بنطرة

_ لزم تتعقم شدلي يدي شاف جرح اففف لزم يتغرز علاه فاش تخمم باش تحل يدك هكا

_ جيت باش نصيح عليه سكت منخمم في شئ

_ تقص في سلاطة واللهي ملي ريتها موش قد بعضها حسيت باش تصير حاجة جوبو صانع

_ كمل اخدمو تو نهزها انا للكلينيك

_ لا كلينيك لاشئ هاي فرمسي قريبة هوني تو تقوم بالواجب

_ جبدني من يدي يكركر فيا... يعيشك سي احمد مايجيش هكا جبدت يدي

_ علاش شنوة لمايجيش اطلع في لكرهبة شوف دمك يقطر

_ دخلت بعد مكبش

_ بقيت نوريلو في لفارمسي وين ..كيف قاتلي لزم نغرزها 3 عرز قلبي وجعني وعيني دمعت كبشت فيه امان لا احمد نخاف منجمش

_ علاش لخوف لحظة وتتعدي

_ لا امان منجمش لا

_ شدلي يدي .هاني معاك وقت للتوجع عضلي يدي شقولك

_ بصيف باش اقتنعت مع كل غرزة نعضلو يدو بقوة قلبت دنيا بصياح بقيت مكبشة فيه دهشت من لوجيعة ...

_ دموعها قطعولي قلبي يدها لمكبشة فيا كيف صغير يستنجد بوه حتي عضنها مكنش مقلقني علي خد مقلقتني دموعها لفوق يدي ...وقت لكملت حسيتها دهشت ثنيت ركايبي ..وقعدت مقابلها ..لباس ملاك كملنا سايي كانت قارصة علي شفيفها ليرقلو ودموعها معبية خدها ...جبدت بابي مسحتلها عينيها يزي بلا دموع قومتها خلصت وخرجت ..

_ بعد لعملو معايا قداه عز بيا لا يعرفي لا نعرفو وقف معايا كان يسوق ونري في يدو حمراء من لعظان مديت يدي انا عملت فيك هكا

_خزلي وبعد خزر ليدو يضحك بقوة ايه يلا انتي ريت تقول نمر ملا سنين عندك

_ سامحني وجعتك

_ سماح نفدلك معاك لمهم انتي لبس (هانا وصلنا اهبط )

_ وصلت لبرتماني مدلي ساشي دواء متنساش تعقمها يوم بيوم وان شاء الله لباس

_ يعيشك سي احمد بالحق مزيتك مننهاش

_ جيران مدام ملاك ربي يشفيك سلام

حلقة الثامنة

ام يافا

لحب وماأدراك ما الحب اجمل شعور يختلج قلب الانسان يزعزعلو كيانو يناسيه في اسمو ويخله طاير يقول طفل صغير يري دنيا قلوب ...سماء روز ونجوم في يشوفهم في عز لقايلة دنيا تلمع علي قد لقة العين ..تحس روحك خفيف ..مهما كان عمرك ومهما كانت مكانتك وقت لحب يدق لباب معليك كان تخضع وتنبطح لضوضاء لاكتسحت حياتك مع لحب لايوجود قيم لا يوجد عادات ولا تقاليد لاتوجد قيود يجوز او لا يجوز (رائ يخص أم يافا )

متعنكشة في مخدة تناجي فيها تحب تعبر لجماد ممكن يفهمها او حتي يفرجن عليها لصيرلها لخوضلها قلبها وعقلها خلاها تخمم في ماضيها ومستقبلها كبشت في مخدة تبكي علي لحصللها بين يجي ومايجيش ومعاتبة ضمير رقدت وقلبها منفوخ ...قامت لفجر صلت وبقات تخمم لزم من ليوم تحاول تتجنبو ..ميجيش عيب حتي تفكر في راجل اخر حتي لو راجلها ميت ..كيف كل يوم خرجت تخدم اما ليوم غير كل ايام ليوم لقلب يخمم في راجل دخل لحياتها من ايام ...أول مسكرت لباب تقابلت لعين في لعين ..غمضت عينيها موش متمنيا تراه وخاصة في قمة ضعفها ...

مكنش خير منها من لحظة لخلاها ورجع وهيا في بالو يدها للمست يدو شفيفها للمست يدو حتي لو بعظة وجعتو استنجدها بيه بقا محفور في بالو عداها ليلة يتقلب في لفرش لحب يجيه نوم ولاتهد ...صبح يعمل في جرية يحب ينحي غمة سكنت بين ضلوع غمة في مجرد فكرة مهما كان هو رجل شرقي كيفاه يخمم في مري وارملة ومن فوق بصغير شئ لكنلو لا علي لبال ولا علي لخاطر لكن احكام لقلب مفيهاش جدال ...وقت لراها خارجة من شقتها كبس علي يدو ليزي سكنت في بالو زيد قبلها من لفجاري ...صباح لخير مدام ملاك

_ صباح لخير سي احمد ..هبطت راسها وقدمت باش تهبط من دروج

_ لباس يدك جوبها ويخزر لوجها لاصفر

_ لباس يعيشك سي احمد ...ومرسي علي لعملتو معايا امس مزيتك مننسهاش وياريت تقولي قداه دفعت بين دواء وعلاج

_ معجبتوش كلمتها حسها اهانة ليه ...ميجيش لكلام مدام ملاك جيران احنا ومخسرت شئ لكلو من خير ربي واجب عليا

 _ يعيشك اما مايجيش

_ قص عليها يجي وعيب عنا مري تقول هكا

_ مفهمتكش

_ انك تسئلني علي فلوس دفعتها

_ سامحني مقصدتش راهو اما حبيت نعرف حقك

_ مزلت تعاود فيها

_ حستو يشري في شبوك سكتت لمهم يعيشك ومرسي

_ وين مشايا

_ نعم سؤالو استغربتو

_ قصدت مزلت يدك مجروحة مايجيش تمشي تخدم (حمحم)

_ اش باش نعمل خدمة لزم نكون موجودة من صباح

_ وصحتك خلي شكون في بلاصتك

_ منوثق في حد

_ موش مشكلة ثيقة كل شئ تنجم يتقيد راهو ويظهرلي لمطعم بلكاميرا اي خلل تنجم تشوفو

_ حتي ولو قلبي يبقي مشغشب تعودت يما تجرحت اكثر منهكا ...لمهم نخليك سي احمد سلام

_ سلام رودبالك علي روحك باهي

_ خزرتلو ...في عينيه لكان لونهم كيف لون لعسل دخلوها بعضها ...ان شاء الله تبسمت وهبطت تزرب مرتين قريب تجي علي وجها وهيا تتعثر بين درجات

حلقة تاسعة

ام يافا

كمل

خدمتو علي بكري بقا يطلب في ايمن لمجاش للخدمة مهزش عليه طلب حتي عايدة كيف كيف ...تعدي يفطر دخل ملقهاش في كاسة شدتها كيف لعادة ...

طلب سندويتش وبقا يكونكتي وكل مرة يسرق نظرة ...قلبو توغوش زعمة روحت ومريضة ..خلص وخرج يسوق ويخمم يتعدي يطل عليها ولا اش مكلفو اصل ...قريب يوصل لدار تلفونو صونة يلقاه ايمن هز متنرفز عليه ياولدي وينك فجعتني لباس

_ مانيش لباس احمد ولدي ظهر عندو فتق وشرطو عليا نطهرو

_ سملة علي ولدي ايه متتفجعش عادي تصير ايمن نعرف قلبك كبير

_ نعرف اما مك تعرف الام عايدة اك حدها من بكري تبكي لاحبت تسكت

_ باهي صبرها واحكي معاها وين انت تو

_ روحت لدار

_ باهي شوي ونجيك

_ رجع علي طريقو خذا بوكي نورا ...ومشالو

_ من ساعة تسكت فيها قلب لام لاحبت تسكت لا ترقد

_ يزي ياعايدة وخيتي علاه تفاول علي وليدك

_ مزال صغير وليدي وفرحا بيه ملاك وخيتي كيفاه باش يتجرح

_ياعايدة  وخيتي سنة الله في خلقو وراسك مزال صغير يطهر خير وفيسع مايبري بربي يزي شوف حتي ايمن اك حدو طيحتلو قلبو

_ حبيت نفرح ونعمل سهرة ولمة وعوادة

_ اي اش بيه تعمل لمة ولعوادة حتي تو وراس اختي عادي من غدوة مطهرو صغرون كان بفرحة ولعوادة وخلي لحكاية عليا

_ لا ملاك يعيشك متعبش روحك

_ شنوا يمن ولدي راهو اش يفرق علي عبدو ...وليوم كلم لعايلة وقلهم باش نعملو فرحة صغيرة ...وغدوة تو لخدامة لعندي يحضرلكم لعشا ولحلو لكل وملازمو من عندي انا

_ ووه يااملاك مايجيش

_ والله لاصارها هكي هدية من عندي وليوم نمشي نشري لولدي جبة وملازم طهور

_ يحييك ياملاك ياوخيتي ربي يعطيك علي قد قلبك

_ معادش تقول هكا عايدة اختي انتي لطلعت بيها من دنيا لعملتو معايا معملوش حد اخر

_ معنديش مزية ملاك وخيتي راك

لباب دق جيت باش نقوم نحل قالي ايمن اكيد احمد قلبي رف بدني عرق شديت بلاصتي ..وسكتت ..دخل في يدو بوكي دوفلور وجهو كان منور لبسة وضخامة تقول عريس غلب عليا ...سلم علي عايدة ومد يدو سلم عليا بدني لكل فبري ...جبدت يدي فيسع ...بقيت نسمع فيه كيفاه يواسي فيهم ..تفجئ كيف قالوا يمن غدوة نعملو حفلة صغيرة ...خزرتو ذوبتني كيف عرف اني انا اقترحت لفكرة وتكلفت عليها ...

ملا تحب نعاونكم في حاجة قالي ايمن

_ لا ايمن خليك بحذا عايدة غمزتو محتاجتك تو

_ موش ياسر عليك ملاك

_ عادي تو نكلم واحد ملولاد معايا

_ علاش هاني موجود ولعشية منقريش لو تحب تو نعاونك

_ واللهي احسن متعمل احمد وخي ...هك تري ملاك يدها مجروحة

_ متخافش هاني معاها ...

خرجت قلبي يعزق بقوة من قربو ركبت معاه وتعدينا للاسواق ...شرينا لوازم طهور لكل مخلانيش نشد حاجة بيدي ولا ندفع حاجة

_  وقت لمشيت خذيت لحلو ...دفع زادة طلعلي دم ...مسيو احمد مايجيش راهو انا تكفلت بهذا لكل خلي فلوسك عندك

_ خلصت سايي ولد ايمن ولدي راهو

_ نعرف اما

_ قص عليا لا اما لا إلا موش قتلك كيف تبدي معايا متخلصش حلوة داخل مع مري وهيا لتخلص

_ علاه بابا شبيها لمري

_ مابيها شئ لمري نحطها فوق راسي من فوق اما لمري مري وراجل راجل

_ غالط فما نساء بالف راجل ونساء براجل ونص

_ هز لبكوات في يدو وخرج بقيت نتبع فيه ...اول حاجة نكرها هذي مري ونص لمري متسمي عليها لفيانة موش حلو تتسمي عليها رجولة حتي بكلمة ولا ريت مري سترجلت راهو راجل لمعاه ذكر

_ ياسر تفكيرك رجعي ضرب لكل عايش لبري

_ حتي لو عشت سنين مبادئي ماتتبدلش (حللها باب لكرهبة )تفضل مدام ملاك

_ جيت باش ندخل ...نسمع في اسمي وحد ينادي عليا تلفتت نلقاه مكرم قري معايا وجارنا في لبلاد ...مشتلو سملت عليه بالبوس يامكرم وخي سنين ماريتكش

_ حتي انا والله قريب منطلعكش لباس

_ حمدلله بخير وانتي شعامل تو

_هاني نخدم في لخليج خرجت بكونترا

_ مبروك فرحتلك

_ راجلك هذا

_ لا موش راجلي جاري

_ اه سامحني مد يدو سلم علي احمد لوجهو كان ميتفسرش ...

_وينك وينو عبدو عودتش حياتك

_ لا ووه بعد لمرحوم صعيب ندخل راجل لحياتي

_ فهمتك لمهم بربي سلملي علي خالتي ليامنة برشا وسلم علي عبدو

_ يوصل مكرم رودبالك علي روحك

_ طلعت بجنبو كان يسوق بسرعة علي غير لعادة حتي لكلام متكلمش مفهمتش شبيه وشنوة لصابو ...وصلنا لدار ايمن هبط لقضيات كبشو فينا باش نتعشو بحذاهم حتي في لعشا دوب مكلا خرج هو ايمن للبلكون يحكو ودخان عجاجة يرحي فيه رحيان

_ نظمت مع عايدة للزم وجيت باش نكلم تاكسي تروح بيا ...ندت عايدة لايمن قاتلو يجي يوصلني

_ علاش تو نوصلها انا بيدي مروح

_ موش حابة نروح حومتنا ضيقة وناس لكل تعرف بعضها لو يروني ندخل ونخرج  معاه متولي حكاية ورواية سكتت منجمتش نقول خاصة كيف كبشت عايدة ..

وصلني لدار تقريب قال كلمتين ولا ثلاث ولغريبة هبطني وتعدي اكيد ماشي يسهر ويجيب في لبنات كيف لعادة دخلت لدار وكيف كل يوم نفس سيناريو من عند امي كفاه توخرت مروحة عقاب ليل وارملة مايجيش ناس مترحمش اش تيقولو وهات مك لحديث طمنت علي ولدي قعدت بحذاه شوي وتخمدت رقدت وانا بين نارين ...

حلقة العاشرة

ام يافا

فقت من لفجاري لزم نقوم مع عايدة بالواجب ...مشيت من صباح لرستو وصيت فريق منهم باش يتولهو بتحضير لعشا طهور من غير ما يحلو ليوم خطرت ميني خفيف حوت وسلايط وطواجن ..وبعثت زو زاخرين باش يتولهو بتحضير لحلو وجي ...نص نهار تعدي واحنا مشنوقين بين حط ورد ...اهل عايدة بدي يجو واهل ايمن دار بدات تتعبي ...بقينا نستقبلو في كل مرة في حد ...لعشية جات كل شئ كان حاضر جنينة متاع دار لفرقة جات بقيا كان انا وعايدة نخزرلو لبعضنا نستنا حتي باش نشرو حوايج للفرحة ...خطفتني عايدة معاها لسونتر لديما تمشيلو ملي دخلنا واحنا نختارو في لروب نلقوش حاجة تولمنا ...واخير طحت بروب في روج هيا لواتاتني كانت مسنترة علي بدني ...طويلة من فوق لكلها دنتال فيها تقعويرة من تالي جاتني كيف لعريانة شوية اقنعوني بصيف ...معندي حتي حل ...سيبت روحي للكوافير كيف ماقاتلي عايدة وقت لقمت وريت روحي مصدقتش بقيت نقلهم شكون حتي انا ليا سنين متوالهيتش بروحي هكا ...شعري خليتو  مفرود علي اقل يغطي شوي لعري لفي ظهري فمي بروج لغامق عينينا مخدومين بالاسود ....

 محلاك ملاك تهبل اصل

_ بالحق عايدة

_ ياوخيتي وين مخبية ها زين لكل ليلة ميجو يخطبوك

_ هههه يخطبوني يعطيك ياعايدة تو انا متاع شئ هذا

_ علاه وخيتي من كبرك مزلت صغيرة الف راجل يتمناك

_ وانا منتمني حتي راجل يزي جربت مرة وحبيت وربي حبو الله يرحمو من بعد معادش تحلالي رجال

_ الله يرحمو وخيتي انتي ادري وان شاء الله متندمش هاي خلينا نمشو هاني كلمت ايمن قالي باش يبعث احمد راهو قريب يوصل

_ بدني رعش اول مذكرت ا سمو (شبيني شنوة لصابني علاش اسمو يرعشلي قلبي )خلي عليك تو نخذو تاكسي من بكري قتلك نهزو كرهبتي

_ وخيتي هيا قريبة لدار ونسيت باش نتوخرو مايجيش نمشو دنيا ظلام واحنا هكا يخطفونا اصل

_ والله عيودتي لحوت عليك تقتل اصل

_ بالحق نعجب هكا

_ تي قول تقتل خمسة وخميس علي اختي

_ وقت لطلبها احمد وقالها راني وصلت هبطت ويدي علي قلبي عملت كاب فورير فوق كتافي دنيا مزلت باردة شوي ...وعلي اقل نغطي روحي من سنين ملبستش هكا قريب ننسي الي انثي وقت لخرجت حسيت حتي لعباد لفي شارع تخرلي من كثرة مانسيت حتي كيفاه نتزين ناس شفوني غريبة ...

_ من لحظة لقالي ايمن باش تمشي تجيبهم وانا ملهوف منعرفش علاش نحب نراها متزينة زعمة كيفاه باش تجي ...من امس وانا منرفز وخاصة بعد ماريت لولاد يبوس فيها حتي لو بوس تسليم محملتش منعرفش علاش وزيد كلمتها بعد راجلي مستحيل نعاود حياتي ضيقتني وبرشا حاسس روحي متناقض يعني موش انا اصلا ضد موضوع نتزوج بارملة علاش تنرفزت ....اول مخرجت وريتها فمي تحل طاق قلبي عزق بقوة ساحرة قول فاتنة كأنها موش هيا مكنتش نتصور باش تطلع بها لجمال هذا منين كنت قاعد في لكرهبة خرجت من غير منشعر ...عينيا من عليها متشلتش حتي عايدة حسيتها شلقت بيا تبسمت وقدمت سلمت عليا احمد وخي تعبنا ك

_ لا ولو عايدة مفماش تعب خزرتلها صحة عايدة

_ يعيشك احمد حتي انتي صحة تبارك الله علي خويا ان شاء الله يارب نراك عريس ونقوم بالواجب معاك

_ ان شاء الله شيعت عيني ليها وطلعت كلمت صحة بصيف حولت منخزرش اكثر بدني لكل عرق حاسس الي انا تفضحت قدام مرت صاحبي ...ركبو من تالي مكنتش منجم نركز في طريق قدامي كل مرة كنت نخطف في نظرة لغريب وين نخزر نلقاها مركزة معايا اول متلمح عيني تهبط عينيها هاربة ولا خايفة ومنعرفش من شنوة

ملي ريتو بالكوستيم وانا قلبي فضحني حستو باش يخرج من بين ضلوعي وهرتو وشارم لعندو خلاه يكون مميز ساعات بعض رجال حتي لو موش مزيانين برشا لكن ريشة لعندهم وشارم سبسيال يخليهم مميزين عن غيرهم ....وهو خذا منهم لكل حاجة فريدة هكا كان يظهرلي حتي نظرتو لحسيتها باش تنقبني ذوبتني موش عارفة يخزر ببراءة ولا يخزر بااعجاب صحيح معنديش خبرة في ها لمجال اما كومام نفهم شوي في خزرة رجال ..ملي وصلنا لفرقة تضرب دخلنا لقينا ايمن ملبس صغرون ويستنو فينا نظرة ايمن لعايدة وبوستو علي خدها كيف راها مزينة كلمة صحة محلاك حسدتها فيها موش خيوبة قلب اما وجيعة لو جاعبدو حي كنت انا في بلاصتها ديما بغصتي في فرح ولا حزن منلقاش راجل لختارتو معايا يشاركني همومي وفرحي احزاني وجيعتي وضحكتي ...منلقاش راجل نرمي حملي عليه ونرقد لصباح في حضنو نخاف نرقد ساعات نخمم فيه نخمم في بدن مري صغيرة تحرم من لحب نصبر ونستعوذ ونسكت ...كل هذا ناس ميعرفوشو ساعات حتي كلمة "هجالة "تعتبر سلخ ليك ولمشاعرك اما شكون لباش يفهم كيف منقولو لملافظ سعد واحنا اغلبيتنا ملا فظنا جارحة وكاوية

حلقة 11

أم يافا

احلي حاجة في دنيا لفرحة جو وربوخ احنا توانسة نموتو علي لمة علي جو وضجكة حتي في ميتنا تلقنا مخرجينو بزغرودة وساعات مع دمعة بسمة ...تونسي لعياش رغم لفقر لخصاصة تلقاه لبسمة مرسومة   متفارقش لفم وكلمة لحمد متخطي لفم ...بسطتنا مزهيا حياتنا قلوبنا لمتشدش لبغض ...(واكيد موش لكل كيف متلقي لباهي تلقي لخايبة هاكي لحلقات كيفاه دور خير وشر)...دار تملي وتفرغ ناس تشطح وناس تصفق ...ناس تزغرد وتبارك وتهني رغم الاف لوجوه مرسومة بضحكة لكن لقلب متعر ش اش مخيبي بين مهموم وحزين أما مخلينها علي ربي...عايدة وايمن ليلة كاملة يشطحو عملو جو وشاخو بطهور صغرون ...كنت نري في احمد كيفاه هازز صغرون فوق رقبتو فارح مع صحبو وعشيرو ...محلاح قداه يهبل قلبي وجعني علي لصايرلي هزيت روحي نجري لدوش بقيت نخزر روحي قلبي موجوع حتي فرحة نغصتها علي روحي لايزي متمنيا وجود عبدو معايا ولايزي نخمم في راجل اخر مخي تلخبط معادش مفرزة اش نخمم خرجت وانا نعاتب في روحي علاش ديما مسكرة علي روحي خليني نفرح كيف ندادي مزلت صغيرة وانا مدفونة بالحياة ..خذيت بخاطر عايدة وهبطت نشطح معاها نحيت لكاب لفورير كيف سخنت ...نحيت غمة علي قلبي بين ربوخ وشرقي وانا نميل ...

من لحظة لريتها وانا مركز كان معاها بسمتها سياسيتها تربيتها باينة مري عاقلة ورزينة ...اما من لحظة لوقفت وشطحت وانا مخي شاط زاد كملت نحبت لكاب وظهر بدنها الي خبلي عينيا...بقيت نخزر ونرعش في ساقي من لغزو ل انا راجل ونفهم نظرة رجال كل واحد فيهم يخزرلها ظاهر بشهوة وجهي لكل عرق منزلت كان علي دخان نحرق في دمي لتحرق واعصابي لشاطط (شبيني اش دخلني فيها شكوني في حياتي باش نغار ايه هذي علامات لغيرة حبيت قبل ونعرف شمعناها عصابك تتحرق علي راجل خزر لمري تعنيلك )

وقت لريتها دخلت لدار لحقت عليها كنت متمني نشدها نقلها متخرجش بسما روب متشطحش تمنيت نسكر عليها في داخلي ومايراها حد ...كنت باش ندخل للكورزين حبست اش باش نقول واش باش نحكي جيت راجع سمعت عايدة تحكي

_ تعرف ملوكة من بكري عيون رجال لكل عليك

_ووه عليا انا (كنت نشرب قريب نشرق )

_متقوليش ملحظتش ياوحيدة اما فما عينين من بكري تلق من الاعجاب

_ شكونو قلتها بلهفة

_ سيد احمد

_ بالحق (قلتها بفرحة )

_ ياوحيدة علاش عينيك لقت وفرحت

_ انا لا كلام منين تجيب فيه ها تخريف (هبطت راسي حاشمة )

_ منين ليا من خزرتك ياوحيدة لباش تنقبو بيها وخلي عاد وين تراه وجهك ياحمار

_ يهديك عايدة وخيتي راجل غير منقل وليت هذا لكل

_ باش تعلمني في عشيرتي راني حفظتك صم

_ يزي عايدة ليسمع يصدق

_ علاش عاد شبيه منحقك تعاود حياتك باش تعيش طول عمرك وحد ك

_ بربي عايدة يزي من ربي قلبي منفوخ خليني نفرح ليلة ليا سنين ما تفرهدتش

_ خاطر غبية فما وحدة تدفن روحها بالحياة زعمة عبدو في بلاصتك يبقي ها سنين لكل عايش بين حيوط شوف روحك كي لوردة لمفتحة ليوم بالحق حسيت ملاك رجعت لدنيا خمم في روحك مزلت تكبر ولزم راجل تتسند عليه

_ كنت باش نجوبها لو موش اختها دخلت من بابا لوراني متاع لكوجينة ...ملي دخلت وعينيها قلوب وشدت يد عايدة وتسئل وتنسنس عيودتي وخيتي  شكونو لمز لمعا نسيبي

_ علا شكون تحكي

_ علي بقلاوة بزايد شحور لشد امين في يدو

_ متقوليش تحكي علي احمد صاحبو هكا

_ ياخرشية موش اختك انا صاحبو وما  تخطبنيش ليه

_دا علي لونك امشي اشطح واخطانا من حسك فيسع اخرج

_ هاني خارجة اما وعد نطيحو ونعرس بيه

.. قلبي ولا يدق من كلمها حسيت بنار شعلت فيا غرت ايه نعم غرت ليا سنين علي

ها الاحساس شنو لصابني ياربي سيدي خليت عايدة تحكي وخرجت لزم نروح معادش نجم نقعد مشيت لبيت صغار وين حطا عبدو لرقد في نص سهرية...أول ماجيت دايرة في لكلوار ندخل في شكون دنيا مكنتش ضاوية برشا لكن ريحتو عرفتني فيه ترهوجت قريب نطيح شدني بين يديه كنت قريبة لدرجة تنفس بيه قلبي اعلن لاستنفار صفارات الانذار بدات دق بقوة للي حستو باش يطلع من بين ضلوع لكلي عرقت وذبت مكنش خير منها وقت لسمعها خارجة حب يهرب ملقا كان لكلوار ليهز لبيوت بقا غادي يحب يتنفس بعد كلامها بعايدة حسها حتي هيا مركزة معاه وهذا في حد ذاتو خلاه يرفرف من لفرحة انو جا حتي علي بالها اما لمقرولوش حساب تدخل فيه بدنها يلمس بدنو يدو تشدلها يده لحسو حاجة قوية موش جديدة عليه هذا موش اعجاب هذي ضوضاء باش دخلو في حيط ...بعد عليها يخزر لوجها لعينيها لتملع مزغلة بدموع يخزر لشفايفها لبروج كانو يغريو تمني يذوقهم يطعمهم يحط شفايفو فوقهم كبس علي يدو علي تخريف لخرف فيه ضعف ولاول مرة تصير حمحم باش يفيق من لخبطة لصارتلو ديزولي مدام ملاك

_ مصار شئ سي احمد ...وهزيت روحي ومشيت لكن مشيت بقلب يدق ينغمة جديدة احساس لمكبوت لفي داخلي تمرد ضمير غاب وشعور طغي وخلق ضوضاء لحب من موعد ام نظرة ام لقاء لحد الا ن موش عارفة وقتها دقلو لقلب وعلاش دق ولواش حس بها الاحساس من غير عطاء من غير كلام ولافعال واكبر خوف لحب لمنظرة هو اقوي انواع لحب حب الاحساس موش حب الافعال لدوم مفعولو كيف سم ليعيش مع الانسان حتي بعد مايموت ساكن في لعظم والروح  .

حلقة 12

ام يافا

خرجت لبري نتنسم معادش قادر حتي نرد لهواء بقيت نعاتب في روحي علي لصابني نسمع في حس ورايا ريتها شدة ولدها في يدها ..وامها تمشي وراها قدمت هزيتو من يدها علاش تهز فيه مدام ملاك تتحل لغرز لفي يدك

_ يعيشك سي احمد لزم نروح شكون باش يتلهي بيا تو باش يهزو

_ علاش مقتليش

_ (من ربي نحب نهرب منو وكأنو لقدر يبعث فيه ليا وقت لهز عبدو من يدي قلبي رفرف من يدو للمست صدري)يعيشك سي احمد هاني كلمت تاكسي تو يجيني

_ لا والله مصارها اصلا وقيت حتي انا مروح خوذ حل لكرهبة

_ هزيت منو لمفتاح وصلنا كنت وين نهز عيني نلقاه يخزرلي حتي امي حسيتها شلقت بيه ...طلع عبدو معايا للبرتمان وشرط يحطو في فرشو حتي كيف جا ماشي باسو وخرج يوصي علي يدي باش منتعبهاش قداشو حنين وسيس بتت ليلتها نخمم فيه رغم كلمة امي ...(راجل من لطلعنا لكرهبة عراك بعينه )

رقدت بين سؤال حيرني زعمة نعجبو ؟زعمة عندو شكون ؟

ليوم ممشيتش نخدم من سهرة لبارح تعبت ...بقيت نهار كامل بين لعب مع عبدو كل مرة نحط فيلم تفرج عليه قلقت قمت حضرت قاتو نعدو بيه لعشوية ...بعد مطيبتو بقيت نزين فيه وانا نكلم في عايدة طمني علي امين صغرون ...لقاتو جا يشهي تقول عملو شاف متمرس وقت لكليتو حسيت الي لزم نودو منو ...عضيت شفتي زعمة يجي غفلت امي مدخلت تقيل  ...حطيتلو في صحن بدلت حوايج ماخير حتي من لبرفان رشيت بزايد جيت خارجة تفكرت نعمل شوي روج مايجيج نخرج شفايفي شايحة ...(حسيت روحي وليت مراهقة ) ندق في بابو وقلبو يدق لو تخرج امي ومتلقانيش نهار يزراق اصل ...بدني لكل يرعش تقول نعمل في لحرام ولعيب وقت لحلي لباب قلبي رف كانت عينينه بنوم لبس خلعة بيضة وشورط وحافي في رجليه ياربي سيدي (تجلطت اصل جيت نتكلم وليت نوكوك عينيا زغلت من شئ لنري فيه )

_ كنت نتأفف اشكون لجايني علي صباح من لبارح مرقدتش ....وقت لحليت ولقيتها هيا ..منعرفش شصارلي وقت لريتها فرحت ...منتخيلش كيفاه حسيتها دخلة بعضها نسيت الي خارج بشورط وخلعة ...جات راجعة جبدتها ...من يدها ودخلتها ...لباس ملاك ادخل

_ سامحني سي احمد حبيت نذوقك شوي قاتو يظهرلي فيقتك

_ لا بالعكس احسن كي فيقتني هزيت لغطا لفوق صحن اممم قاتو بشوكلاه تعرف الي انا نعشقو

_ صحة خو ملا

_ هز لكوجينة لحظة نبدل دبشي ونعملو قهوة نشربوه مع بعضنا

_ لا سي احمد منقلقكش

_ بالعكس علاش تقلقني لحقيقة نحب قهيوة عربي ومنعرفش نطيبها بلقدا تعمل عليا مزية وانا مع لقاتو نحب قهوة عربي بزهر

_ تدلل باهي....دخلت نزرب للكورزين نطيب في لقهوة وقلبي يرعش من شئ لكنت نري فيه بقت عضة علي شفتي ...محلاه وهو فايق بنوم تقول ملك ياسر بريئ ..

معرفتش اش نعمل من لفرحة وقت لريتها جاتني دخلت نزرب بدلت سرفاتمون دخلت غسلت وجهي وسنوني وخرجت نزرب نلقاها صبت لقهوة في لكيسان تفحفح امممم تفكرني بقهوة امي ياسر ريحتها بنينة

_ صحة سي احمد اعمل سكر علي حسب ذوقك 

_ (قعدت علي كرسي نترشف فيها ياسر بنينة ) نشربها من غير سكر كيف تبدي مع حاجة حلوة باش تجي متوازنة

_ تعرف كيفي ونعشق لقهوة

_ هانا نجتمعو في حاجة

_ اممم صحيح

_ بقت نخزرلها محلاها قداشها شرمونت عينيها فيهم حكاية وحزن فيهم بقينا نتعرفو علي بعضنا ونحكو حكايتها حزينة قداه غاضتني ...لباب يدق خلاها تتهز وتتنفض قامت كيف ل

ملسوعة يعيشك سي احمد شكون لجاي

_ اهدي قمت من لكرسي وشدتلها يدها شبيك خايفة موش نعملو في لعيب

_ لا خبيني يعيشك لو حد يعرف اني هوني معاك وحدنا ما يؤلفوا لف حكاية

_ باهي ايجا ادخل لبيتي ومتخافش حتي نشوف شكون خبيتها في بيتي وخرجت

نشوف في زائر ثقيل

    

حلقة13

ام يافا

بدنها لكل يخض زيد سمعت صوت مري زعمة شكون دوب محلت باب لبيت وبقات طول تشوف في قنبلة موقوتة واقفة قدام احمد شئ لخلا عنيها ترمش بقوة ...تري فيها مخذا راحتها وتناحي في لفاست متاعها وقعدت تخذت عليها وقتاه باش تروح ضاهر باش تبنك لمري ...بقات تكسر في وذنها وتسمع

_ ملي راها تصدم كيفاه عرفت دارو وعلاش جات ....دخلها بصيف عليه عين عليها وعين علي بيت لفيها ملاك ..

_ شعاملة نهي لباس

_ لباس احمد بخير انتي سافا

_ لباس حمدلله بخير يعيشك احمد انتي لوينك حتي رجعت وما قلتش نسئل

_ فاش قام نسئل حط ساق وبقا يخزرلها

_ لدرجة نسيتني

_ مك لعام مفهمتش علا ش جيت اصل

_ امان هكا عوض تفرح الي رتني

_ نفرح فاش قام لفرح بربي نفرح بمري اول راجل جاها خذاتو وخلاتني

_ مخذيتوش وانتي تعرف قداه نحبك تعرف دارنا صعاب وقبلت بصيف وحمدلله بطلت ومعرستش لدرجة قلبك اسود

_ قلبي موش اسود اما عمايلك سودة يزي يعيشك متخلينيش نرجع لماضي نسيه

_ مستحيل تنساني وقفت وقعدت بجنبو

_ بقا مصدوم من وقحتها جا باش يبعد كبشت فيه يعيشك احمد متصدنيش متوحشتك لصار غصبا عني راهو

_ يعيشك نهي حكايتي معاك وفات تعمل مزية جيت طل عليا يعيشك ولو مستغرب منين جبت عنواني

_قامت وقت لقام يعني مصر تجافيني

_ اموري عاد هاكي مدخلكش

_ لا دخلني انتي راجل لحبيتو ونحبو لاخر لعمر

_ صدقتك يزي بلا تمثيل وحكايتنا وفات ليها شهور تفضل عندي منعمل

_ موش علي كيفك اعطيني فرصة رمات روحها عليه تحب تحظنو شدها من يدها اخر مرة مزلت تعملها انساني نهي وحكايتنا وفات لو حبيتني كنت تحديت قتلك نعرس بيك اما انتي يظهر عجبك لعندو لفلوس اغني ولد بشوات

غالط وراسك احمد لتو نحبك والله لا خطيتها كان مجبورة

_ يعيشك روح (صوت تلفون صونا )خلا نهي تخزر للبيت ...

_ فما شكون هوني

_ مفما حد ...دخل بعضو تلفوني يصوني

_ بربي تلفونك بقات تخزر لعينيه ...وشنوة تلفون لفوق طاولة متاع شكون

_ جايا تعملي في تحقيق

_ قولي لقيت غيري ونساتك فيا اما مسالش احمد نرجعك ومتقولش نهي تنجم تغلبها مري وتفكلها راجل حبيتو ...هزت ساكها وخرجت

_وقت لراتها خرجت تزرب وجها احمر مغصور ملا عملة كلبة صارتلها ...كان حاطط يدو وري راسو يمشي فيها ويجيب من لغزول .. شافها حشم منها بعد لسمعتو

_ سامحني سي احمد لزم نمشي

_ خليك كمل لقهوة بقا يخزر لملامحها لمتبدلة

_ لا امي راهي فاقت تو يعيشك خليني نمشي سلام ...وخرجت مقهورة ملي دخلت لبيتها وقلبها وجعها يعني كان يحب مري ومجروح منها تنجم ترجعلو في اي وقت وداويه مدام حلفت وقاتلو متفكك حتي وحدة غيري هيا تعرف عقار نسا ...بقات تمشي وتجي في بيتها تخزر روحها ساعات وتلعن روحها علي لوصتلتلو كيف مقالتلها عايدة من سنين مراتهاش قدة روحها تلبس في لبسة تعيف تقول زوفري شعرها تاعب مصبغتوش من سنين ..بقات تعدي في يدها علي خدها علي شفايفها ..تلمس في بدنها لزم ترجع كيف مكانت تتوالها بروحها منحقها تعيش ..بدلت حوايجها وهزت مفتاح لكرهبة ...وخرجت عرضتها امها غير مقيما

_اهلا امي

_ وين مشيا بنتي

_ مشيا نشري في شوي دبش امي علاش

_ وحدك بقات تخزرلها

_ ملا شكون معايا

_ وشكون تيسوق بيك هاي يدك لتو مجرحة

_ نسوق وحدي امي نجم بدي جرح يتلم

_ باهي لمهم رودبالك علي روحك ..وصاتها علي قضيات وخرجت ...عشوية كاملة عدتها تشري وتختار شرات كدس دبش متاع خرجة ودبش حلو ويوالم لخدمة تعدت لسونتر لكملتهم وخذات موعد لقاتهم يستنو فيها ...صبغت شعرها شتان عملت كوب علي طولو ..عملت دي سوان لوجها ...مونيكير ميكاج فينو ...بقات تخزر روحها تبدلت يقول موش هيا لبست روب نوار وبوتيان نوار لبست كبوطها وخرجت طول علي عايدة بقات بحذاها شوي ...وطمنت علي امين ....اخت عايدة كرهتها في روحها كل دقيقة تسئل وتعاود علي احمد اخرها كلمت ايمن قاتلو ستدعيه هانا ملمومين ...

_ قتلتني بلغزول كنت باش نروح منعرفش علاش بقيت ميلزمش نخليها تستفرد بيه ...كملت عليا عايدة لاول مراتني لشكون هذا لكل شنوة هازين تي حتي من ايمن بقا مصدوم ...حسوني كنت ميت وحيت من جديد بقيت نخمم زعمة كيف يراني نعجبو زعمة يلاحظ تغير ...وقت لدق لباب ومشات سمر اخت عايدة تحل قلبي وجعني سمر ياسر حلوة غنجة تقول قمرة ...سلم عليها ودخل اول مشافني حسيتو لاحظ لفرق بقا يخزر بانبهار هذا لضاهر تبسمتلو من لفرحة منعرفش علاش يدو وقت للمست يدي كرهبتني ومن فوق بقا كابس علي يدي مفهمتش علاش ...

تعشينا وانا نفبري من ساقي من لحظة لدخل سمر مخلاتوش لحظة وزاد بصدفة طلعت  تقري في نفس لفاك ليقري فيها وكل مرة تطلعلو بسؤال ولغزلني كان يجاوب فيها حسيتو مضروب فيها غيرتي هكا اكدتلي ...قمت هزيت كابوطي

_ عايد ة و وخيتي وقيت لزم نروح تو هاني طليت علي امين ان شاء الله لباس

_ يعيشك حبيتي والله مزيتك منننساهاش

_ من غير مزية لبست كبوطي وخرجت ...موصلت كان مروح طلعت من عيني لتعمات من لعصب ...وقت لركيت لكرهبة نسمع في صوت كرهبتو وريا تلفتت نلقاه راكة كرهبتو بجنبي ...سكرت لكرهبة وطلعت لحق عليا وهو ينادي مدام ملاك

_ حبست وبقيت نخزرلو للي قرب نعم سي احمد

_ حبيت نقلك صحة علي لوك جديد ياسر واتك لون شعر ههه اول مريتك قريب منعرفكش صباح ريتك بنوع وتو بنوع نقصد وليت محلاك ياسر وتاك لون شعر  (دخل بعضو موش عارف اش يحكي من لحظة لراها عينيه ولات قلوب من زينها يقلك لقدة نص زين وهيا زينها كان غابر في شوالق ذكورة وتحت وجه اصفر وشايح من غير متعتني بيه)

_ حشمت لكلي  عرقت وليت نرقل (مانيش مصدقة هو يقولي محلاني يعني تعبي ممشاش خسارة تبسمت من شق لشق بكل فرحة قلبي يدق حسيتو باش يفضحني )

_ يعيشك سي احمد

_ فك علينا من سي وعود قول احمد

_ لا مايجيش (نحكي وطالعين في دروج)

_ لايجي احنا جيران وليوم كلينا قهوة وحلو

_ هههه موش ماء وملح

_ هههه مدام مكليناش ماء وملح نوالي نرودها حلو اش خير من لحلو

_ مفماش ماخير منو ...نقلك تصبح لخير هانا وصلنا

_ علي خير (بقت نحزرلها وهيا دخله هزت قلبي ودخلت وخلتني تائه فيها وفي لون عينيها لخبلي عينيا)دخلت وصورتها وخيالها محفور في قلبي الي عرفت الي مغروم بيها

 ...

حلقة 14

ام يافا

دخلت ضحكة مليا عيني قلبي يفرفط بالفرحة كلمة محلاك وخزرتو ذوبتني وخلاتني نحس روحي ضايعة بين عينيه وكلامو لعسل ...اما لمكتبلو لحزن يقعد طول عمرو فيه نلقي امي متحزمتلي مخلات ماقالت في مايجيش انتي ارملة مروحة لوقت هذا نطقتني للي وليت نصيح متأكدة لهوي يسمع فيا

_ زيد علي في صوتك ملاك هذي تربيتي فيك

_ امي نطقتني وليت هاملة تو

_ مقلتش هاملة قتلك لتعمل فيه يهز للهملة مروح لعاشرة متاع ليل مشيت بلون جيت بلون

_ اموري امي مكهبة علي ثلاثين وقت لنغلط ونعمل لعيب حسبني قتلك حبيت نتوالها بروحي كي خلق ربي اما انتي ظاهرة تشري شبوك من يوم يومك وانتي تذل فيا في مايجيش راجل ميتك عيب حتي لو نلبس لون غير لغامق يافضيحتي يجي هو راجلك ميت كرهتني وعيفتني في حياتي زمانكم غير زمانا

_ ناس هيا ناس خايفة عليك بنتي لو يسمعو اخوتك نهار يحراف

_ خليهم يسمعو علاش شعندي كيف صبغت شعري هذا لبيك امي واناهو لسد عليا منهم شكون فيهم يدز لباب ويطل علي ولدي

_ مكش ناقصة

_ لبحر يحب زيادة امي نتمني يجبوصاك ياغورت ويمدوه لعبدو حاجة بسيطة تفرحني وتفرح ولدي منلقاهم فالحين كان هبط راسك مايجيش ماتعملش ماتمشيش ...كل حد حر في روحو هاون نقلك من تو يزي عبدو مات وموش نسيتو باش تفكرني بيه وكلام ناس معندو لا ينقص مني لا يزيدني لعيب نغلط ودخلت غميت علي راسي ورقدت بتت بشهقتي دموعي علي خدي ...

تعداو ايام وليالي حالتي ماشيا وتتؤزم امي وترتلي عصابي حتي علي خدمتي وقت  نمشي نخم لفجر ولات تعمللها حساب قلبي وجعني ...وكل مرة جايتني بحكاية ناس قالو بدلت ومكيجت ندري شعندها ...كرهوني في صبغة لصبغتها فدوني في حياتي للي خذيت تيب صبغت شعري اسود كيف حياتي لمقدر عليا منخرج من حفرة رماني فيها لقدر وااراء مجتمع لارملة تموت بالحياة وتدفن روحها تحت مسما لايجوز عاهات تحكم في العقول لواهية تافهة ساذجة ...

ليا ايام نراه من بعيد حاولت نتجنب وندفن الاحسا س لفي داخلي وصل كيف نراه جاي يتغدي نهز روحي وندخل لداخل للي روح ...معادش حابة نراه نحب ننسي يزي لصايرلي من جرت صبغة وتبديل لوك لو يسمعو حتي اني عيني رفت لراجل وعجبني مانوالي علكة في لفام يقيمو وبيا ويصبحو عليا ....

كملت لعشية موخر لخدمة كلمت امي نقصاش حاجة تعديت خذيت لناقص وروحت ...حضرت لعشا في اصحنة بقينا نتعشو علي بكري ...بقيت نتفرج علي تلفزة للي قاتلي امي اخرج خرج لبوبال هبطتها وجيت راجعه مزلت غير منجبد في لمفتاح ويد تجبدني وقت لريتو وتلاقت لعين في لعين احساس قوي انتباني تمنيت قربو توحشت كل حاجة فيه رغم كتمت ولجمت منجمتش تحكم في احساس دخل لقلبي وهل بعد حكم لقلب حكم؟يدو تجبد فيا لبرتمانو قلبي وقف يعيشك سي ااحمد شنوة تحب

_ باش نحكي معاك متخافش مدامك تتجنب فيا مفما حتي حل كان هكا دخلني وسكر لباب انا نرقل كيف قصة ريح

حلقة 15

أم يافا

بدنها لكلو يخض كان قريبلها "قول لصق فيها يتنفس في وجوه بعضهم لعين ترمش وتلق من ربثة  ومن قوة شعور لجتحهم..يدو شدة في زندتها ومقربها ليه كأنو خايف لتهرب عليه ...نطق بوحش ايام بلخبطة مشاعر موش فاهم وين باش تهزو وين باش ترصي ها الذبذبات لحسها نحيتها ...علاش هاربة مني ملاك علاش تتجنب فيا علاش وين تراني تبدل ثنية علاش وقت لنجيت لمطعم تبقي بساعة متخبية قولي لواش

_ يعيشك سيد احمد علاش تسئل فيا  وهوني ابعدني يعيشك عيب لتعمل فيه جات تجبد روحها ليزي ربثة وليزي سؤالو لمفهمتوش

_ مستحيل تخرج قبل متجوبني

_ علاش باش نجاوبك جوبتو بنطرة قلي تحب تعرف علاش منجمش نقلك ومستحيل نقلك ويعيشك احترمني وضعيتي غير كل نساء جيران علي ابسط حاجة يقطعو في لحمي ويريشو متكمل تلقاهم غنية جديدة

_ خايفة من ناس ملاك وروحك

_ شبيها روحي لباس علاها جات شكاتلك بعد عليها وبقا يخزر لبدنها ليرعش بكلو حتي من عينيها ترمش بقوة وشفايفها يرقلو

_ خايفة مني ملاك

_ علاش باش نخاف منك سيد احمد مفمهتش علاش جايبني هوني كنت تنجم تسئل ها سؤال لبري لو امي تعرف الي انا هوني متوالي تؤول وتألف من راسها خليني نمشي يعيشك جات باش دور صوتو حبسها بقات مكبشة علي كوبة ومغمضة عينيها

من لحظة لريتك حسيتك انسانة متمردة انثي مسترجلة معطيتش اهتمام ليك ولا لشخصك لكن منعرفش مع الايام نظرة لولات متبدلة ناحيتك وخاصة وقت عرفت حكايتك

_ جوبتو وهيا كابسة علي بواني ..ممكن شفقت عليا ...جات تحل في لباب سكر بيدو ولصق فيها من تالي ....

_ مشفقتش عليك علاش متقولش عجبتني علاش متقولش اسرتني علاش متقولش خربشتلي قلبي ودخلت في عقلي نار شخصيتك ونار برائتك وصدقك حلاوة ولسانك وكلامو لعسل ليقطر مري وازنة رصينة وعاقلة عقل كبير وقلب اكبر لاول مرة منخزرش لمري في بدنها لوجها لانوثتها ...خزرتي لانثي من يوم لعرفتك تبدلت  ...خليتني مؤسور بها القوة لعندك والشخصية نارية طاهرة شخصية لمري المناضلة لمري لحتي كيف مات حبها بقات محافظة علي عهد ومسلمتش في وتخلت عليه

_ كلامو ذوبها خلا عينيها تزغلل دموع مع كل كلمة حستها تنعويش لقلبها الا كلمة حستها سكين تغرس بين ضلوع وبقا يعدي فيه ويجب دارتلو ودمعة سبقتها خنت سيد احمد خنت من لحظة لعرفتك خنت عبدو صورتك ساكنة هوني (ضربت راسها بصبعها ) ...كل كلمة تقولها نحسها كل بسمة كل حركة قلبي يدق بقوة وقت لعيني تجي في عينك بدني يعرق وريقي يشيح من قلة لكلمة اصلا مزال كلام في حضورك يعيشك ابعدني خليني نكمل حياتي كيف مكانت وياريت تخرج منها دار في اقرب وقت معادش نحب نراك عاوني يعيشك خليني ننسي

_ جبدها ليه كلامها حسو عطاه اشارة باش يبدي باش يبني احساس كبلو وخلاه يتلوي ...بعد لقلتو مستحيل نسيبك مستحيل اعطي لروحك فرصة وليا

_ منعطيكش حتي ربع فرصة انتي عازب وصغير تحب تفرح وتتهني بمري من ثوبك متثقفة صبية تكون اول راجل في حياتها قلبها ليك وحدك ماتعلقش بغيرك تعمل عرس وتتهني كيف ندادك

_ علاش مستحقره روحك علاش مكش مري

_ مري مري اما انا غير غير لاني من ثوبك لاني متاعك يعيشك سيد احمد

يعيشك لو تحترمني شوي ابعد خليني وحدي لنعمل فيه اثم ومايجيش ...

_ موش علي كيفك ملاك شوف اخزر روحك علاش متقمصة دور ضحية علاش تتهاون وتتخاذل في حق نفسك

_ خاطر روحي ماتت معاه خلالي امانة نحميه ونرعاه تحب نعيش قصة حب مع راجل وثنين وثلاثة وبعد يقولي حبيت صحيح اما ولاد رجال منقبلهومش اصلا اش نخرف شكون لمزال يقبل يعرس بمري بصغيرها وانتي تعرف مجتمعنا ميرحمش ومتأكدة هذا تفكير وتفكير الاف غيرك

_ منكذبش عليك عمري مخمتت فيها لفكرة موش احتقار لا اما غيرة رجل شرقي يحب يكون هو اول رجل في حياة لمري لحبها موش عادات وكلام ناس وقيل وقال لا مبدئ كنت ماشي بيه

_ خليك علي مبدئك سيد احمد

_ مبدئي غالط وقلبي دقلك نشقو قلبي

_ مجرد اعجاب حاجة جديدة مجربتهاش

_ موش صغير انا ملاك موش نرضع في صبعي باش منعرفش انا شنحس وشمنحسش حبيتك ملاك هذا لظاهر مانيش رومانسي منعرفش نقول اشعار منعرفش نعبر غير بكلام لخارج من قلبي لزم تعطيني فرصة ..

حلقة 16

ام يافا .

_ مفماش حتي فرصة ليك وليا يعيشك سيد احمد جات خارجة ملزمش تضعف ملزمش ترخ وتخلي لقلب يتحكم فيها .يدو رجعتها ولصقتها علي لحيط لصق فيها خشمو يمشي ويجي فوق خدها شلها وخلاها تفغم من قربو ريحتو دغديغة لبنينة لسرات في بدنها صوتو روجولي لسحرها كلامو لخلاه تعترف حتي بينها وبين روحها انها عاشقة متيمة

_ ملاكي متمشيش متهربش وتحرمنا منها شعور اعطيني فرصة حبيتك صدقني مستعد نكون معاك لاخر لعمر قلبي دقلك بعد سنين حب قلبي كان موجوع من لحظة لدقلك شفي وتعلم يحب لكن حب صحيح موش حب صغر ملاكي يعيشك اعطي فرصة تعيش كيف ندادك

_ تكلمت بصوت باح من قربو لذوبها ...يعيشك احمد سيبني

_ كان حاسس بي نار لفي دخلها حب يستغلها باش يلين قلبها ...طبع بوسة خفيفة بجنب شفيفها يدها كبست عليه وعينيها تغمضت بالوقت ...تكلم وهو يبوس فيها بتمهل قلي علاش ذايبة هكا علاش نفس باش يتقص عليك من قربي علاش لكلك ترقل شفت لصايرلك صايرلي متكبرش ملاكي خليك معايا خلينا نعيشو لمكتوب ولمقدر

_ حطت يدها علي صدرو وتكملت بعين مزغللة رغبة سيد احمد خليني نخرج ونوعدك نخمم (حبت تهرب قبل متضعف وترخ متمنيا قربوا كثر منومتمنيا لمستو وهمستو وقبلتو لشعلت نارها وجاشها وخلاتها تحس بأنوثتها لفاحطة من سنين ...

_ وعد تخمم لصالح حبنا موش هكا

_ بقات تحرك في راسها بأيه مزال عندها جهد باش تحكي تي حتي نفس قريب يتقص

_ بعد عليها مكره خايف تفهمو بالغالط ويظغط عليها وخايف يضعف رجولتو سيطرت عليه وخلاتو يخمم بشهوة منحيتها ...روح ملاك اما عنا كلام في الايام جايا

_ تنفست بقوة وبقات تخزرلو وخرجت لفوهة جهنم امها كي ستبطتها خرجت تلوج عليها وقت لجات راجعة لبرتمان بعد مهبطت لوطا لقاتها خارجة من برتمانو ويدو شددها وسمعت كان كلمة ملاكي خمم بقلبك موش بعقلك ضربت صدرها بقوة وشهقت يافضحيتك يا ملاك

_ ملاك من لحظة ضعف من لمسة يدو سمعت صوت امها قلبها لكان يدق حب ولا يدق خوف تلفتلها وجبدت يدها بقوة من احمد وعينيها تعبت دموع امي

_ امك متحياش شتعمل عند عازب وحدو تحكي ومقربتلها باش تلقفها من شعرها يدها لقريب توصل لراسها شدها احمد وجبد ملاك وراه مدام يعيشك مايجيش معقول باش تضربها

_ نضربها قول نفتفتها وانتي دورك مزال شتعمل بنتي عندك في عقاب ليالي

_ يعيشك امي استهدي بالله جيران تسمع ميجيش

_ خليهم يسمعو جيران محكرتهم انتي ياناري علي روحي يافضيحتي من ولي علكة في لفام طيحتلي خشمي وخشم خواها في تراب والله منكلمهوم يجو يقتلوك ويرتوحوني من عارك

_ عينيها سبايح من كلامها جارح امي يعيشك يزي انا واحمد مابيني وبينو شئ فاش قام هكا يعيشك

_ بدات تعلي في صوتها للي احمد تنرفز مدام كنت نحكي معاها نحب نخذها باهيشي ويزي بربي لتعمل فيه مايجيش طفلة نهار كامل خنقينها

_ يعيشك سي احمد قاتلو ملاك بصوت معبي دموع

_ بقا يخزرلها بحرقة دموعها شووه ملاك حاشتي بيك في لحلال وهاو قدام امك وليوم قبل غدوة مستعدة نعرس بيك ولدك ولدي يعيشك مترفضش

_ هبلت انت ملاك ادخل لداخل عندي كلام وانتي ابعد علي بنتي ومن ليوم تعمل مزية تمد لمفتاح وديار ياسر

_ موش حابب يغلط معاها متمني يهز ملاك من يدها ويحطها في قلبو لكن عين ملاك لترجتو باش يسكت ويخلاها خلاتو حابس في بلاصتو للي سكرت لباب وغابت مع غيباها صوت امها كان عالي صياحها قبب ضرب باب لبرتمان بيدو بقوة ودخل قعد علي فوتاي وكل مرة يسمع صواتهم لعالية

...   حلقة 17

ام يافا

تبكي بصوت من كلام امها جارح كلامها كيف سكاكن خلاتها تنطق بحرارة روح

_ يزي يزي امي عقدتك سعادتي علاش تحبني نعيش تحت ساقين علاش تحب نبقي ممقوتة حياتي لكل ملاك متضحكش ماتحكيش متخرجش يافضيحتك مايجيش ناقص كان تقولي ملاك احفر حفرة وموت

_ باش نحفرهالك لحفرة ياملاك خواك ليلة يجوك معادش نجمك كبر راسك

_ خوايا كلمهم تراه يعرفوني ولا يعرفو طريق داري تي انتي امهم ناسينك تلفون ميخسروش عليك لو ملقيتنيش انا راك ليوم في شارع نسيت شعملولك ولو يقرعو عليك كل يوم عندو حد

_ ياناري عليك تعاير فيا لميتني في دارك

_ معيرتكش وعمري ممنيت ماو نعرفك عاد كي تبدي تألف وتهول يزي امي يزي راني بنتك انا موش هوما اما ديما رجل مفضل وخير كان لخري جا صالح فيهم ربي

_ محسوب انتي لصالح فيك خارجة من دار راجل عقاب ليل

_ حرة لعيب نعمل لغالط واخر مرة مزلت تحاسبني معادش ملاك صغيرة حطها في بالك ودخلت وخلاتها تبكي بصوت ...

تعدالو نهار رزين يستني وقتاه يكمل لمحاضرات باش يمشيلها ليوم يفضها معاها وليوم لزم يخذ كلمة اول مكمل خرج لقا اخت عايدة قدامو سلم عليها بقات مكبشة فيه للي لحق ايمن عليه كبش باش يمشو يتغدو جميع ملي وصل لرستو وراها كيفاه وجها اصفر وعينيها محوقة ظاهرة مرقدتش بقا يتتنهد بصيف محستش حتي بيه

_ من لحظة لدخلت لخدمة و مخي  مشغشب وصلت غلطت في لحسابات كل مرة  نصيح ونعارك من غير سبب كل شوي نخزر لباب زعمة يجي يتغدي ليوم...أول مريتو قلبي رفرف اما لفرحة مطولتش وقت لريت معاه لصقة كانت تمشي وتقيس فيه بعينيها نفخت بفدة عرفتها عينها عليه سلمت عليهم وبقات نحكي معاهم شوي حضرولهم لبلا وبقاو يتغدو كل مرة نري فيهم يضحكو صوتهم وصلي طلعلي دم راسي متمنيا نمشي نفتقهم من بعضهم هذا للبارح يقلي نعرس بيك ضربت يدي علي كونتوار بقوة ودخلت وين لكوزيين بقات فما للروحو لعشية بعد متهنيت كملنا وصفيت لحسابات كيف كل يوم هزيت صاكي وخرجت دنيا بدات تظلم شوي ..هذي حياتي نشدها من ظلمة لظلمة حتي حياتي ولات ظلمة ...يد خطفتني تفجعت بقيت نرقل جيت باش نضربو ضحكتو خلات يدي معلقة

_ هههه شنوة ملاك باش تضربني

_ سيد احمد فجعتني

_ لطف عليك

_ مروحتش شبيك لتو هوني

_ لا روحت بقيت نحرر في الوقت نعرفك تروح لوقيت هذا

_ سيد احمد متظغطش عليا

_ اخر كلام ملاك

_ يعيشك سيد احمد انا وياك حكايتنا صعيبة ومستحيلة خلينا جيران

_ منجمش

_ مفهمتكش

_ باش نلبيلك طلبك كنت منتظر بعد كلام امك لبارح توافق وتعيش حياتك اما يظهرلي مفماش بلاصة في حياتك دونك حتي جيران صعيب نبقو ايام لوج علي برتما ن اخر ونخرج وسامحني قلقتك ومشي يزرب موش حاب يضعف يزي مسترخص روحو هو يؤمن بحريات واحترام الاخر حتي لو شخص لقدامو حبو اما مستحيل يطيح خشمو ليه لزم يخرج من حياتها وفي اقرب وقت

زعمة أنجل تبقي في جلباب لخوف من لعاهات لمسيطرين علي حياتها حتي بمجرد اراء متناقلة ؟زعمة تخلي احمد يخرج من حياتها وتنسي شعور جديد لدخل لحياتها بعد مقلبها اصبح صحراء قاحلة ؟

حلقة 18

ام يافا

القرارت مبنية علي اراء الاخرين مألها لفشل""(أم يافا)

أيام وليالي نوم جفاها حياتها  زادت مرار في مرار ليوم ليتعدي كي خوه لاعاد حليلها نوم لاماكلة لشراب تتمني تموت وترتاح ملي كبرت شافت كان لعذاب موش عارفة علاش لقدر مصر يعذبها اكثر..توحشتو توحشت طلتو نظرتو صوتو وريحتو متمني تراه تكحل عينيها بيه من ليوم لخرج من لبرتمان ...لالمحتو لاكحلت لعين بيه قامت كيف كل يوم تتحرك بصيف حتي لخدمة هملتها ولات تمشي قليل ومزالت تحللها خدمة ولا تحللها عيشة بعد لحب لدخل قلبها ..بعد محست بااحساس رجوع عبدو لديارو بعد عليها وكأنو لحياة مصرة علي تفريق رجل عشقتو بالموت ورجل حبتو بالحياة ولا قول قرار اتتخذته العادات والتقاليد لا كيانها المنبطح ....

_كيفاه باش نحكي ونقول كيفاه باش نفسر لفي داخلي كبير نعرف الي اكثركم باش يقولو ضعيفة تهاونت وانبطحت وخممت في لغير قبل لروح شنوة نعمل انا ذنبي اني جيت انثي وفي مجتمع عاق فكريا يعتبر لارملة ميتة بالحياة ولزم تتكفن في جلباب الزوج المتوفي حتي تأتيها لمنية جهل صح لا موش جهل حتي لعقول راقية ضد ها لفكرة تعرفو علاش خاطر مجتمعم  ...من لول متربي علي اساس غالط برغم لا شرع ولا دين اباح ها الفعل بل بالعكس صحابة اكثر ناس تزوجو نساء الارامل ويعتبر تزوج الارملة امر شهم لستر عرض رجل متوفي ..المسئلة بنسبالي موش مسئلة ستر اكثر انا مري مزلت صغيرة نحب نعيش نتفرهد نحب نكون مع شخص نحبو ويحبني كيف ندخل لفرشي يكون دافي نفس مونسني نحب كيف نحزن نلقي شكون يفرحني نمرض نلقي ليسهر فوق راسي نطيح يقيمني نغلط يصلحني انا مري ولمري كائن مستضعف كائن الي يجي يعفس عليه بصباطو لعينين لكل طمعا فيها وشئ هذا كل يوم نراه حتي من نظرة تحسو من كلمة تمرر بين الاحرف ...برشا ضد ها لفكرة وضد انو مري تخمم هكا ايه نعم حتي انا كنت ضدها لانو عكس برشا حبيتو راجلي ممكن لمسئلة احيانا تتجاوز لحب ساعات لاحترام والعشرة اقوي من لحب وانا لقيتهم مع عبدو كنت ملكة في دارو معزة مكرمة لكن ربي حبو وربي يحب عبدو يكون قوي ميحزنش سنين وانا حزنت ايام وليالي يظهرلي لقدر حب يلعب لعبتو حب يفرحني بها الحب لدخل قلبي من يوم لدخل احمد لحياتي حسيت روحي خفيفة حسيت ا ني طايرة في جنة انو لحياة لونها بانبي ومنورة لوجوه منورة ولوقت فيسع مايتعدي موش كيف قبل كل حاجة في حياتي رزينة نحس في روحي في خدمة عسكرية لنقوم بيه نصبح عليه ومن فوق تسمع لكلام ولخوف معشعش قلبك علي خاطر جناحك مكسور ...تعرفو باش نقول كلام ياسر تعرفوه في وقتنا لقلوب خيابت لقلوب كساحت لاعاد خو يتلفت لخوه ولاعاد حد سد علي حد وقت لطيح بيك شكون باش تلقي باش تلقي خو يهزك يوم وعشرة ومصيرو يفد يقلك مرتي متحبش ولادي اهم اخت محكوم فيه عند لغرب مري بدارها وصغارها تسد علي روحها قبل ...ضناك ممكن وقليل لو جات ضنوة صالحة ولو مجاتش ضنوة صالحة تتعفس تحت ساقين وتموت بقهرتك في دار عجز هذا لو صلك دور ...لمختصر ميسد عليك كان سندك وعضدك راجل لاخترتو مهما تكون فيه عيوب اذا كان ولد اصل مايطيشكش موش باش نقول كلام كبير برشا اما قلبي معبي كل واحد عايش حياتو وطول عرض لكن لمري لكيفي تتدفن لزم تسطر خطوتها وقرارتها علي حسب فلان وعلان واذ معجبش فلان لزم تتواطئ وتنذل بالمختصر عايشة في معتقل ومن فوق مكفن في ثابوت اظلم مكتوب فوقو ارملة لا يحق لها لعيش

حلقة 19

ام يافا

نمشي هايمة فوق الارض كل لوجوه احمد كل الاصوات احمد كل لعطور احمد بت التفت في كل لفينات ابحث عن رجل اختاره لقدر ان يحب مراءة وهنة من طعنات لبشر ..دخلت لخدمتي وكاني ضيفة هائمة في كل لوجوه بت ابحث عن لحظة المح ظله او اسمع همسه وان اري مبسمه ااااه متليعة خرجت من قلبي كاالعادة ايمن جاي يتغدي لوحده كنت سئسله اين رفيقك اين احمدي بت اتخبط في جبني حتي باخراج حرف علتي بكمت وصمت ...صوت ايمن رجعني من شرود كاد يقتلني

_ ملاك لباس

_ حمدلله ايمن لباس انت ويني عايدة

_ بخير هكا ياهاربة لاطل لاتجي عنا

_ الله غالب ظروف

_ طل عاد

_ اكيد ايمن سلم علي عايدة

_ اه عايدة ها ليمات غاطسة

_ فاش

_ ماو احمد يحضر في خطبتو علي قريب

_ كلمة نزلت عليا كيف صاعقة خطبتو نحكي بصوت دوب مطلع من لفجعة

_ ايه احمد قرر ياخذ اخت لمدام لحاصل عايدة هكا حدها بين اختها واحمد تعرف وحداني هوني

_ ربي يهنيه خرجت مني بحرارة روح دوب مخرج هزيت مفاتح كرهبتي نسوق بكل قوة للي بدات تتمايل بيا كنت نري في لموت نحب نحقق موتي علي اقل ندفن تحت تراب خير منعيش في مجتمع عاق يحكم كان بنفاق ...مرسيا ومرفئي كانت مقبرة دفنت فيها حاضري وماضيا ومستقبلي دخلت نترمي نبكي بصوت كانو فما بعض الزائرين للمقابر يخزرولي ممكن تخيل وان فقدت عزيز في الايام هذي مكنوش يعرف وان الموت ساكن في داخلي

طحت نبكي فوق قبرو فوق حجرة نشكي في همي ما أبشعه من موقف صح في الايام لخوالي ابكي فوق قبره لاشكوه حالي بعد فراقه وليوم اشكوه تعلق قلبي برجل استعمر وجداني واحتلا عرشه اتراك ما تقول ان تلعن انك تزوجت خائن قلي ياعبدو متلومنيش حبيت من بعدك لكن والله حبك في قلبي كبير حبيت وتشويت مشا باش يخطب باش يخذ لغير وانا لرفضتو انا لصديتو وقتلو امشي مترجعش ومتتلفتش وراك قلي عبدو يرضيك لصاير لملاكك تعبت وحدي تعبت نحب نموت ...منعرفش قداه قعدت فوق قبر نفرغ في قلب تعبا هموم شكيت للي عيت هزيت خيباتي وحسارتي اجرها خلفي خلف حطام انثي حكمتها اعراف لعباد ...وصلت لداري لا هتميت بولدي لا باامي نحب فرش ومخده وغطا ثقيل يدفيني من لبرد لنحس فيه عظامي

كان لابس ثوب ابيض لكلو ينور بدنو طاير في لهواء لحيتو بيضة عبدو هو لا غريبة بقيت نقرب ونثبت عبدو لكن بثوب جديد ولحية بيضاء بدل سوداء سئلت علي حالو مديتلو يدي نحب نخذو في حضني جهرني نور طالع من قلبو بعد وتبسملي ملاكي تبع قلبك تبع مصلحتك متسمعش كلام لغير متدفنش روحك ملاكي عيش ملاكي عيش نحبك وانطفئ نور وتحلت عيني نشهق ودموع معبية خدي كنت نحلم ليا شهور مزرانيش عبدو وليوم زراني زعمة هذي موافقة منو بشرة خير... بقيت للفجر وانا فايقة نخمم في منامة وفي خاطري لمكسور وقت لطلعت شمس هزيت روحي بدلت حوايجي وطلعت قبل ماتفيق امي ليوم باش نتبع قلبي باش نحيا ليوم باش نتحدي وخلي لصير صير جيت اول وحدة للجامعة نشوف في طلاب دخلين بقيت نفركس بعيني لزم نراه ونحكي معاه لانعرف دارو لاعنوانو ولا رقم تلفونو زرقت شمس للي ولات قايلة وانا متسندة علي كبوط لكرهبة كل مرة نشرب نروي فحطي من سوايع لانتظار ..واخير جاء واخير هلا لقمر في عز نهار هابط من كرهبتو بكل وهرة لكن وجهو طافي علي غير لعادة حتي لحيتو لكانت ديما محصورة هايجة تري لما حزينة هزيت روحي وسرعت في خطواتي باش نعرضلو مكنش مركز معايا تلفون في يدو غارس عينيه فيه ناديتو بصوت متقطع احمد

حلقة 20

أم يافا

_ من يوم لنقلت وانا روحي ضايعة حاولت برشا مرات انها تحيد عن قرارها تمنيت تعطي فرصة لحبنا لكن ايست مع كل يوم يمر وانا حاسس الي انا نحلب في حلاب مقعور حسيت انو كرامتي طاحت ونداست بعد ها لحب لانا ملول ستصغرتو متخيلتش باش يحطمني كيف هكا قررت نخرج من حياتها لعلي انسي كريت وستقريت لايام لولة قلبي كان مقطع كل يوم كنت مشي نملي عيني منها ونروح باتت خبزي ليوم افيوني اللي يعمرلي راسي ويعدل نهاري وطالت الايام وطال شقاء لقلب بفقدانها لملمت جراحي ورجولتي التي انداست بعد رفضها قررت نتزوج وكان لخيار علي انثي اعرف اصلها ومعدنها ممكن هروب ليها ممكن خوف اني نرجع ونذل نفسي ليها علي هكا قلت لزم نخلي قلبي مقيد برباط حتي لو محسيتش نحيتها بحاجة ايام تفصلني علي موعد خطبتي كل ناس فرحة واهمهم لوالدة ...كل يوم كي خوه نقري نروح نرقد ولا ساعات في اخر الاسبوع نعديه مع لصحاب لصباح نفرهد علي روحي فماش مننسي ليوم صبحت دنيا سخونة شوي ربيع دخل ونسمة ترد روح اما روحي صائمة حتي علي جرعة امل يقذفها الطقس امام عيني ليدخل البهجة كنت داخل باش نقري للي ستوقفني صوتها واااه واااااه من ذاك صوت شجي وتلك الطلة البهية الشمس انطفئت نورها امام نور اشعاع وجها محبوبتي امامي وتنادي بااسمي لوهلة تخيلت اني اتوهم وان التي امامي سراب ....رجعتلها كنت وين نقرب قلبي يخفق هيا بشحمها لحمها ..مدت يدي وسلمت عليها اول ميدها لمست يدي قلبي خفق بقوة كورون ملمسها يخلي روح تفرفط من لفرحة

_ ملاك موش مصدق اقرصني

_ سيد احمد لباس

_ لباس بخير حمدلله انتي شعاملة

_ نحب نحكي معاك فاضي تو

_ حتي لو موش فاضي نفضي روحي نقري بعد ساعة من تو

_ ممكن نمشو لبلاصة نحكو

_ اكيد تحب نمشو للقهوة

_ لا نقصد بلاصة ميراني حد واقفة معاك ممكن ايجا معايا

_ طلعت معاها في كرهبتها وصلنا لفيلا مكنتش بعيدة علي للفاك لنقري فيها خزرتلي اهبط سيد احمد نص ساعة ونوصلك تقري

_ اوكي ملاك متتخيلوش لفرحة لفي داخلي وانا قريبلها كنت متحكم في روحي بصيف باش منشدلهاش يدها ..بقيت نمشي وراها منجمتش نشد روحي باش نشبع من مشيتها وقدها دخلت للفيلا كانت لكلها مظلمة ااثاثها لكلها مغطي بقيت نخزر لملاك لكانت واقفة تخزر لكل تركينة في لفيلا كنت باش نكلمها اما وقت لدارت وريت دموعها علي خدها تشويت قدمت حطيت يدي علي خدها لحرير لمندي بدموع موش عارف سرهم ...ملاكي علاش دموع علاش تبكي وتحرقلي في قلبي

_ قلبك قالتها بشهقة

_ يزي بلا دموع واحكي شنوة لمقلقك اشكي ملاكي شنوة لخلا عينيك يبكو

_ معنديش كلام باش نقول واصلا شنوة باش نحكي وشنوة باش نفسر ملقيت حتي حل غير نعبر علي لفي داخلي بطريقة فطرية وقفت علي اطرف صوابعي قربت ليه وعديت يدي وري رقبتو وجبدتو ليا بدرت بأول قبلة بيني وبينو ويالها من قبلة اسرتني خلاتني نفغم من نشوة معادش قادرة نقف علي ساقي من لحظة للمست شفاهو شفاهي ثواني معدودة اجتحت كياني ...جيت باش نبعد جبدني ليه وكمل لقيادة بوستو ليها طعم خاص خلاتني نغرس ظوافري من قوة لذة دنيا ضبضبت في عيني لزغلت من رغبة ...بعد عليا ينهج خشمو فوق خشمي يتنفس مني انجل حبيتي محلاك مبنك يااحلي مري في دنيا

_ غرست راسي في صدرو بكيت للي بليتلو حوايجو شئ من لذة وشئ من كلامو ولمستو شئ من لخوف انو باش يخطب تكلمت بغيرة بخوف انو يبعد احمد باش تخذ غيري باش تمشي تعرس

_ اسس معندكش لحق تحكي في اي موضوع نحب نكون معاك تو خليك معايا وانسي اي حاجة

_ منجمش ننسي كبشت في مريولو وبقيت نخزر لعينيه قلي طمن قلبي

_ نحبك انجل ونحب نكمل معاك حياتي

_ واخت عايدة

_ كانت هروب منك من حبك لعشعش فيا اعطيتني فرصة  موش هكا بوستك موافقة صح

_ موافقة نكمل حياتي معاك للممات احمد لمهم متخلينيش

_ معاك يااحلي حب في دنيا نحبك نحبك هزها بين يديه يدور بيها موش مصدق الي باش توالي ليه ومتاعو

_ ويبقي سؤال حب اجتاح قلبين سيصمد امام عادات بالية وشنية مخلفات الاراء المتداولة بين مجتمع عاه في فكرو في نبض زواج اعزب باارملة ولها طفل هل ستؤثر علي هذا لحب؟ في لحلقات لقادمة سنعرف الاجابة

حلقة 21

ام يافا

الفرحة متنجمش توصفها قد لحزن كيف تبدي فرحان حتي من عينيك تلق البسمة تترسم ممكن تقول شويه كلمات دل علي سعادة لفي داخلك اما كي تحزن لحديث يكثر تحب تثرثر تخرج كل نقطة حزن في قلبك وخاصة لو حزنك من بشر تلقي روحك زادة تشكي لبشر كيفو يايسمعك ويساندك يايذمك ويكمل علي مرمتك

وانا هذا لصارلي يومين تكتبلي فيهم نفرح بااحمد كنت طايرة فوق سحاب الزهري وفجاءة نطيح للعفن الفكري....أول مناس سمعت اني باش نخذ احمد قامت دنيا وقعدت امي مسكتتش هزت روحها وخرجت لديار اخوتي وهذا بعد مسمت عقل ولدي في امك باش طيشك لو دخل غريب وتعملو بوك في امك باش تجيب شكون يهزلك رزقك نفس لكلام لسمعتو من اخوتي لهدو عليا وسخسخوني ومخلو مقالو فيا حتي من لبزقان بزقو عليا فيهم حتي لجا يتهدد حب يضربني ....نمشي في شارع نسمع في نساء توتوت عليا من غير حشمة قاصدين انا متأكدة في سحرتو باش يخذها في متخزرش بالعشرة نسات رجلها ...في طامع في رزقها وباش تفيه وتخلي روحها بلاش ويبقي ليتيم يصفر بعد مكان وارث وهيا لمتحكمة مررولي عيشتي محقنيش نفرح موش هكا كيف تبدي عايش مع بشر يخممو بفكر متصدع يخممو بدنائة ويفكرو كان بالخايب ويسيؤو ظن بفرد من مجتمعهم فرد ياقريب يابعيد موش مهم صفة لمهم انسان كائن مخلوق تخلق باش يعيش بقرارت ذاتية اذا بيه ولا مقيد بقررات خارجية رجعت لنفس دوامة اما مااقوي خفت وبقيت في دار ي وحدي حتي ولدي حسيتو نفر مني ولا يعلي في صوتو عليا ايام لايواريها لمخلوق ولحبيب وصاعقة لكبري كانت اهل راجلي وقت لهدو عليا سلافي زوز يحب يفكو عبدو

_ ملي ريتهم عرفتهم قلبي تخلع تفضلو سي محمد (سلفي لكبير) دخل ودخل معاه اكبر شخص نكرهو سلفي صغير واحد حسدي وبغضي ميت بالغزول كيفاه ميراث عبدو لكلو باسمي ...

_من غير مقدمات ملاك لسمعناه صحيح

_ اش سمعتو يسمعنا لخير

_ تتزعبن اش سمعنا ( قالها سلفي صغير بنطرة )..

_ انتي بذات من فضلك ياتحكي باأدب ياتخرج من داري

_  طرد فيا من دار خويا

_ دار خوك تعرفها من حياتو متعفسهاش عفستها كان كي تخيلت انك باش تورث ياخي طلعتلك قرعة تتصور نسيت لعملتو من سنين

_ جا باش يحكي شدو محمد ...ريض غسان خلينا نحكي معاها بسياسة

_هذي متفهمش سياسة ياخويا قتلك نمشو نرفعو قضية قتلي لا نحكو بالعقل

_ اش قلت انا تسكت ولا تخرج

_ باهي هاني سكتت (وبقا يقحرلي )

_ شوف ملاك انتي في عوض اختي

_ ربي يستر سي محمد

_ يعيشك امس جانا خبر الي انتي باش تعرس

_ جيت باش نقول والي ممكن تراجعت لكن كلمت غسان خلاتني مصدومة

_ تتهرس قالو تعرس مستحيل تعرس كانشي علي جثتي

_ ملا سي غسان باش نعرس وعلي جثتك وتعمل مزية تخرج من داري خير منطلب لحكام

_ الله الله لله ملا باش تطلبنا لحاكم معقول لتقول فيه (محمد)

_ معقول سي محمد خاطر سي خوك دخل لمحلي وعافس بساطي وشوف اش يحكي

_ جا غسان باش يحكي قص عليه محمد يعني باش تعرس

_ كا ن كتب

_ وعبدو

_ شبيه ولدي

_ باش نهزوه عنا ورزق خويا يرجع موش تهز رزقنا تعطيه للغير

_ رزقي مانعطيه لحد خدمت عليه بشقيا وبعرق جبيني ولدي لو تحبو لقانون تنجمو طالبو بيه غادي فهمت وانتي سي محمد كنت نخزرلك بعين كبيرة خليك محايد ماتبعش لقلوبهم مسودة معندهم وين يوصلوك كان لدعا

_ اخر كلام عندك

_ اخر كلام ولد خوكم لتحكو عليه قداش ليكم ماريتوشو اه ولا فيها رزق تجو تجرو ربي كبير حمدلله عبدو كتب رزقو باسمي واسم ولدو من قبل كان يقلي اخوتي نعرفهم مايخلوكش بعدي كان حاسس لعمرو قصير

_ ومكنش عامل حساب الي لفعة مرتو باش تخذ من بعدو

_ لفعة تمصك سي غسان وتزيد كلمة اخري نجيبلك لحاكم واخرج من داري خير تو (ومشيت نزرب حليت لباب)

_ يعطيك صحة يابنت لاصول قالي محمد

_ خليتو فيها اصول من 4 سنين ماريتكومش وعفستو داري تلفون متهزوشو تسئلو علي ولد خوكم وانتم نص ساعة من داري اش يتسمي هذا كان موش خايبة تتخيل باش نقدركم بعد هذا لكل ولا ناسين تراب عبدو مزال مبلولوانتم من محكمة لمحكمة تجرو علي اوراق الميراث للي طعتلكم قرعة ربي كبير واقوي منكم ودار عبدو باش تبقي محلولة لحب يزور ولدو ولحب ينكد عليا وعلي عبدو ميلقي غول قدامو

_ القانون بينا وبينك

_ نستنا فيكم كان عندكم ريح ذرو عشرة ...

_ قتلوني بالغزول مشيت نرب لبيتي نطلب في احمد هز عليا صوتو منرفز حتي هو يومين مهزيتش عليه وانا نخمم احمد لو تحبني ايجا لدار تو

حلقة 22

_ درجين وكان عندي اول مريتو رميت روحي في حضنو نبكي ونقول مبكيتش حكيتلو علي لصاير لكل بقي يصبر فيا برغم حاسة انو مخبي حاجة خزرتلو بعين معبية دموع شبيك احمد حتي انتي حاستك مهموم

_لباس حبيتي كي ريتك زاح لهم كنت منرفز منك ماتهزش مرتين كنت باش نجي لدار ....ويني امك

_ امي هزت روحها وخرجت ومخلات مقالت وحكيتلو لصار لكل..

_ جبدني حظني بقوة هذا لكل صاير معاك علاش مقلتش

_ شنوة تحبني نقلك الي انا خممت حتي باش نبطل منك

_ كان حظني جبد روحو مني امان يعني خممت تبعد موش هكا

_ احمد

_ لا احمد لازمرة فك عاد علاش ضعيفة هكا وانانية من لحظة لعرفتك وانتي متخمم كان في روحك تتخيل احمد لعبة في يدك وقت لتحب تلعب بيه وقت لتفد ترميها

_ امان هككا تخمم فيا

_ كيفاه تحبني نخمم مدام تحديت وضحيت حتي بعلاقتي بامي واخوتي بصاحبي وعشيري زادة لكلو باش انتي تكون مرتاحة وتوصلي وانت في كل عتبة تعرضك

طيشني وتخمم تخرجني بري حياتك علاش ملاك علاش

_ خاطر انا مري موش راجل محكوم فيا متعملش متقدش عندي صغير عايش معايا كل يوم نسمع غريبة وكل يوم حكاية قلي كيفاه تحب منضعفش نخاف تغدر بيا وتكون نفحة وتصدمني وقتها ممكن ننتكس ونموت بغصتي محروق جاشي ومكوية ناس لكل تخمم في روحها كان فيا تحب نقلك علاش خايفة خاطر وضعيتي غير انا هجالة وانت عازب ليلة عرسي معندي منقدملك كيف كل صبية ...باش نبقي نزور في راجلي ونحي وفاتو كل عام تنجمم تتحمل هذا ابسط الامور ولدي باش يكون كيف ولدك وتحبو ومتفدش منو واخرهم باش تبقي تحبني كيف متوي

_ علاش تسبق في الامور اعطيني فرصة قتلك وعودتها الف مرة موش ملاك انا منغلطش بشر نخطئ ونصيب لمهم منخرجش علي سطر يدي في يدك نتحدو مع بعضنا لحب لمري لتخلقو في قلب راجل لاخر لعمر لو عندك ثيقة في حبك وفي روحك وقادرة تخلي لعبدو للة عاشقك لاخر رمق اصدم ومتخافش لمسئلة عندك موش عندي في يدك يومين ملاك ياتوافق ياترفض واخر فرصة معاك عندي ومن بعد معادش تلوم الي نخرج من حياتك ووعد حتي تونس نخرج منها ...جا خارج لحقت عليه حملتو من تالي خليك احمد يعيشك تعرفني نحبك

_ عرس بيا وتو زادة محشتيش بعوادة وطبالة

_ احمد وداركم وفرحتك

_ دارنا رافضين ملاك معندي حد انتي عايلتي من ليوم لو توافق توالي جنتي ودنيتي امي وبابا وعايلتي

_ وامك لزم تفرح بيك

_ امي قلبها حنين لو عرفت الي عرست ومتهني منتصورهاش ترضي ولدها يبقي من غير عرس وهذا وعد اول متوافق نعملك عرس في بلادي

_ وعبدو

_ عبدو ولدي موش قطعة منك كيفاه منحبوش ملايكة معندو باش ضرني وعد نحميه ونخاف عليه كي بوه وراجلك منحقك كل يوم تتفكرو بالعكس حاجة تفرحني حتي كي حبيتني مانسيتش حبك لول وكنت وفية ليه

_ موافقة احمد

_ ملا بشروط قالها بفرحة

_ شنو تتشرط تو

_ اه لزم لم من ليوم تجيب عبدو وتسكن في داري فرنك من رزقك ورزق ولدك مايدخل لداري وعد منك ليا متخلينيش وتقف معايا تكون عضد وسند ليا وعد تحافظ علي عرض لعبد لله  

_ موافقة وعد

_ نحبك يااحلي مري في دنيا ليوم نمشي لاخوتك ونخطبك منهم ونعلمهم انا باش نعقدو

_ لا متمشيش خاف يعملولك حاجة

_ لخوف من ربي انتي حضر روحك لعشية نكتب صداق فهمت لمد لزم في لزم وهذي نسخة من مفتاح دار وفسر لعبدو شنوة لباش يصير ولو تحب نحكي معاه معاك

_ لا خلي انا نقولو

_ باهي وقيت مزال عندي برشا حجات باش نعملهم باسني علي خدي وخرج لفرحة ماليا عينيه ...دخلت بعضي موش عارفة اش نعمل وحدي معندي حتي حد بخلاف عايدة حتي لو نعرف الي ممكن تكون شايلة في قلبها مني اما هيا اختي وسندي ملي طلبتها جات ومبطاتش عنقتني ودموع لفرحة معبية عينيها تبارك وتعاود حتي في قمة فرحتي منسيتش

عايدة منرفزة مني

_ بالعكس وراسك لا صحيح ملول غضتني شوي من احمد اما من بعد فهمتو لحب ماينجمش يضحي ويخو بالخاطر واحمد حبك وكي انتي كي اختي شنوة لفرق لمهم انتي تكوني مرتاحة واكثر حاجة مفرحتني باش تعيش بجنبي

_كان تري فرحتي انا اما خايفة عبدو ولدي موش قبلها لحكاية

_خليه عليا عبدو تو نفهمو انا بطريقتي ايا وقيت لزم تحضر روحك

_ لزم نلم دبش احمد قالي نهز لدارو

_ متعمل شئ تو نكلم شركة مختصة في الامور هذي ينقلولك لحوايج لتحب عليها وانا نقف عليهم بيدي اول حاجة لزمك لزوم سهرة ليلة ولزم تتحول نقصد تتبدل

_مبلدك

_ مبلدني ياوحيدة قلى راك ميتة فرحة

_ فانية فرحة (وتنهدت بقوة)

_ كلمت عايدة سونتر باش نمشي يهتمو بيا ملي دخلت مخلو معملو منعرفش علي شئ كل شي عايدة قالت باش تتكفل بيه بعد موصيتها الف توصية في توصية

 حلقة 23

ام يافا

ملي خرجت من ملاكي مشيت لخوها لكبير لعلا وعسا يحن قلبو ويلين نعتوني علي دارو حلتلي مرتو بقيت نستني شوي للي جاني من لباب حتي كلمة تفضل مقالهاش بالكذب دخلت ديراكت في الموضوع وطلبت يدها منو

_ معنديش اخت واعمل لتحب ياسيد وقلها اخوتك قالولك انسانا من ليوم جيت باش نحكي سمعت صوت امها لكانت عينيها معبية دموع باش تعرس ليوم

_ كان كتب ياحاجة مانيش نلعب بيها ملاك نحبها متقولش وقح يعبر علي مشاعر قدامي اما هاك لحسيتو قلتو بنتك من حقها تعيش ولزم تفرح عوض تفرحو تلقو راجل يصونها ويحافظ عليها ليلة باش تكتب صداقها بنتك لو تحب تجي داري في **** بجنب دار ايمن وهني علي بنتك وفرحها انتي ام وبلاصتك ميعبيها حد ومشيت بعد مدخلها ولدها وقالها اش عليك فيه مخذاتش شورتنا وعرست بلي تحب تتحمل مسؤلية اختيارها ...

ضغطني لوقت اما كان لزم علي اقل نفرح ملاكي بيت نوم جديدة مشيت شريت بيت نوم وحرصت باش تمشي في يومها وتركب في يومها خذيت بيت صغار لعبدو لزم نخليه يحب لبلاصة جديدة هو صغير ونعرف شمعناها يتيم ...ومن ليوم انا بوه ولزم نودو ...كملت خذيت كوستيم جديد ليا كل مرة نطلب ملاكي نتشحتها باش تبعث صورتها ونراها..كيكست وقاتلي خليك متشوق ليا ....كأنها متعرفش حتي وهيا معايا متلهف عليها ... مزلو ساعات قليلة وتوالي ليا حتي ايمن طلبني هو برغم كنت منرفز منو علي حكاية اخت مرتو كيفاه بطلت منها قالي حشمتني قدام اهل مرتي وسودتلي وجهي اما يبقي عشيري وصاحبي ولقيتو واقف بجنبي لعشية تعديت للحجام عملت كوب جديدة لشعري حصرت لحيتي ورجعت لداري مبقاش وقت ساعة ونص منعمل دوش ونبدل ونمشي نجيب ملاكي ...اول مدخلت لداري بقيت مبهور بلي نري فيه كل شئ منظم ومرتوب لبيت نوم مفرشة والفرش لكلو مزين بنوار عايدة قامت بالواجب بالحق معدنها اصيل وكملو غرقوني بمزايهم وقالولي سهرية باش تكون في دارو ومتخمم في شئ ...جات 7 متاع ليل خزرت روحي اخر خزرة وخرجت لايمن لكان مرجني كل شوي اخرج لعروسة تستني ...

_ صاحبي مبروك ماشاء الله عيني متضرك تقول ملك اصل

_ مريقل ايمون

_ شنوة مريقل عسل اصل خلينا نمشو جماعة يستنو

_ شكون جماعة

_ اهبط تو تعرف

_ اول مخرجت لشارع وريت  كارنفال قدام دار فوق 20 كرهبة صحابي لكل موجودين حتي صحاب لخدمة وشوي من اقاربي لموجودين في تونس اما لفرحني اكثر خويا ومرتو وصغارو موجودين حسيت دنيا زهتلي تمنيت امي تكون موجودة وتحضر فرحتي

_ حملت خويا ودمعة تحصرت في رموش لعين تكلمت بخنقة وانا ربت عليه يالخو ياريت لحنينة جات

_ بعدني خويا وقالي جات يالخو جا وهيا لام لجابت تنجم متحضرش فرحة ولدها

_ ويني قلتها بغصة

_ في كرهبتي جبدني خويا من يدي يقول طفل صغير نري فيها في لكرهبة تمسح في عينيها بدموع حليت باب لكرهبة وجبدتها امي

_ يابابا يانور لعين كانت تحمل فيا وتبوس من كل شيرة فرحت ام مشوية اي ام تتمني تحضر فرحت صغيرها نعرف الي فرحتي جات بزربة اما علاش نؤجل في فرحتي للمكن بين لحظة وثانية تبدل ريها

_ علاش دموع امي

_ هكا احمد تعرس ومتقولش كان موش ايمن بعثلنا

_ امي انتي رفضت وقلت منرضاش عليك وحتي تلفون متهزش عليا

_ عملتك خايبة

_ شنوة امي جايا تعاتب ولا تفرحلي

_ لوم بعد لقضا بدعة هكا اش نقول محبيتش نبغصك ونخليك وحدك يوم فرحتك وهاني جيت اما موش جيت يعني راني قابلة بيها داري متعبتهاش باش يكون في بالك

_ باهي امي لتعملو مبروك لمهم انتي تحضر لفرحتي وتشاركني بيها

_ ربي يفرحك وليدي ويبعد عليك بنات لحرام وظلام

_ صلو علي نبي تو وزغردو يانساء وخلينا نمشو نجيبو لعروس ايا احمد خويا اركب تو نسوق بيك انا

_ يعيشك ايمن مزاياك كثرت علي رقبتي

_ خوك وبين لاخوة مفماش مزايا

حلقة 24

ام يافا

قلبي يزقزق من لفرحة من لحظة لريت روحي بروبة لعروس وانا عينيا مدمعة صحيح موش اول مرة نلبسو لكن ها لمرة عندها نفس طعمة لفرحة مع عبدو راجلي وممكن اقوي علي خاطر فرحة قوة وفرحة حزن تناحي وذني رفت وقت لسمعت تزمير دخلت بعضي للعايدة شاخت ضحك

_ اهدي يقول لعرست قبل

_ ريت عايدة وخيتي يقول اول مرة

_ ياعمري انتي ربي يهنيك ايا عروس مزروب مكش تسمع في تزمير

_ هبطت لكلي نرقل اول مخرجت وريتو قلبي حسيتو وقف نفس لوهرة اما ليوم احلي عينيه لكانت مزغلة بدموع خلوني ندعثر من لفجعة حتي بالفرحة منحملش دموعو يد عايدة لقفتي وكمل يدو لخلطت عليا وشدتني شدلي يدي زوز وبقا يبارك عليا

_ تبارك رحمان حبيتي محلاك

_ عيشك احمد بقيت نخزرلو وانا ميتة حشمة نسمع في تزمير نخزر للكراهب لكراهب معاك

_ ايه معايا واي جات وخويا وعايلتو

_ حسيت بفرحة الي اهلو موافقين زاد طمنت اكثر برغم لغصة لفي داخلي ماريت حد من عايلتي ركبوني في لكرهبة عملو بيا دورة في شوارع لعاصمة وانا ميتة حشمة من يد احمد لمحبتش تسيبني ولا كل مرة يهز كفي ويبوسو للي وليت نرعش

_ وصلنا لدار ايمن جنينة كانت محضرينها يقول عرس في يوم تحضر هذا لكل ...صحيح لحفلة كانت صغيرة اما لفرحة كبيرة ناس لكل تشطح وتغني حتي عبدو حسيتو فرحان وشطح مع ايمن وجا باسني وقالي ماما مبروك فرحت قد دنيا انو وليدي موافق ...خو احمد وعايلتو سلمو عليا وكان ضاهرين فرحانين اما امو حسيتها سلمت بصيف متطلبش خبرة باش تعرف حد ملزوز ولا منلومهاش هيا ام وتتمني صغيرها يعرس بصبيه هذي عقليت اغلبية توانسا ..

. اول مصححت علي عقد زواج عيني تعبت دموع يد احمد مسحتلي دموعي قدام ناس تمنيت واحد من اخوتي ولا امي يكونو معايا ولا واحد قلبو حن ولان كتبنا صداقنا ولفرحة معبية قلوبنا زوز احمد لعاقل رصين جبدني وشطحني قالي ليوم باش نعمل لمحضور كل حاجة ضدها انا باش نعملها شطحنا لصباح بين ناس فرحانة بالحق من لقلب وناس في دخلها صدمة علي علاقة زوز يعتبروها ممنوعة وغير مشرعة في قانون الانسانية

...

حلقة 25

ام يافا

وقت لدخلت لداري محلاه احساس لحسيتو كل شئ كان مرتوب بيت لكلها شموع ريحة لعنبر مليا لبيت نوار فوق لفرش ومعبي لفيزان عطرو يفوح في كل دار يد احمد لتعدت فوق بطني خلات بدني يرعش دغديغة بنينة سرات في كل بدني نفس متاعو لفي رقبتي ذوبني بوستو لفوق شعري هبلتني يدو لتجبد في سحاب روبة...رعشتني شديتلو يدو وأنا ميتة حشمة ...صوتو لحنين بجنب وذني ملاكي حاشمة

_ قرصتلو علي يدو وبقيت نرقل وكانها ليلة بالحق دخلتي ...دورني ليه لقا دمعة محصورة في رمشي حسيتو تفجع تكلم  بخوف شبيك ملاكي علاش دموع موش فال باهي

_ دموع لفرحة احمد

_ ربي يفرحك ياروح احمد يزي حتي دمعة لفرحة ممنوعة تخرج منها لعنين مدامك معايا نحبك ماتبكيش لحزن ممنوع ومايجوزش ..فهمت

_ فهمت

_ باهي لو خايفة وتحبني نخرج نخرج لمهم راحتك

_ لا خليك حقك احمد

_ وقت لعطيتو لإشارة هزني بين يديه وحطني فوق فرش معبي نوار جا فوقي باسني فوق جبيني  وعزف فوق بدني احلي لألحان طيرني وخلاني نعشق بدني نساني همومي ملكني وطبع رجولتو فوق جسد فاحط من قلة لحب ...عيشني لحظات من لجنة في فردوس الأحمدي برجولة خططت أحلي لمسات وأحلي لهمسات فصرت أعشق لغة الحب وشغف لحب وهمس الحب الأحمدي

فقت صباح وانا مدقدقة من من حبو (حسيت بدني لكل مكسر أما تكسير حلو برشا )لقيتو راقد بجنبي علي بطنو يدو مكبشة فيا ومقربني يقول خايف لا نهرب دوب ماتحركت بشوية باش نقيموش ...قمت من جنبو وأنا موش مصدقة دنيا كيفاه زاهتلي وأخير ا فرحت كيف ندادي دخلت عملت دوش وبدلت دبشي عملت شوية مكياج ليوم صبحيتي ومن ليوم لزم نهتم بروحي ...دخلت للكوزين باش نحضرلو فطورو ملقيت شئ جبدت تلفوني باش نكلم رستو يحضرولي فطور نلقي مساج من عايدة (صباح لهناء ياعروسة نهارك زين وصباحية مباركة وقت لتقوم اطلبني لفطور حاضر يستني فيك )طلبتها وانا ميتة حشمة

_ صباحو عايدة

_صباحو روحي صباح لهناء بذرية صالحة يارب

_ يعيشك حبيتي

_ اه قمتو

_ لاقمت انا وحدي

_ باهي درج نجيبلك لفطور

_ وينو عبدو مسئلش عليا

_ هاو مع امين يلعب ومعاه ايمن متخافش عليه تولها براجلك مزلت عروسة

_ جيبو معاك نبوسو برك توحشتو

_ وووه يزي يابنتي راك عروس مايجيش ايا علق لحظة ونجيك

حلقة 26

ام يافا

جابتلي لفطور لخير لكل موجود في صينية من لباب محبتش حتي تدخل ومننسوش عاد سؤلات لعادة شعمل معاك زوج لحنون حشمتني وروحت دخلت بصينية لبيت لتو راقد قعدت علي اطرف لفرش بديت نعدي في يدو علي ظهرو ونجيب محلاه مانيش مصدقة الي انا معرسة براجل هكا حبيبي حمودة قوم

_ اممم دوب محل عينيه يتملل خزرلي عين بعين وجبدني طيحني فوقو صباحو حبيبتي صباحو ياأحلي عروسة في دنيا

_ صباحو حبي

_ روحي انتي محلاه صباح معاك

_ يعيشك قوم لفطور حاضر

_ انا فطور باش نفطرك انتي

_ احمد قام من لفرش وجبدني قربني لصدرو لعاري باش ندوشلك ودوشلي

_ يزي كنت ندوش من بكري

_ شاهي دوش اخر وهزني بين يديه عشت لحظات من الفردوس بين لمساتو لحنينة وانفاسو ساحرة وكلماتو رنانة للأسرة "كم أعشق جسدي وأنا بين يديك "

تعدت أيام لعسل ورجعنا لخدمنا كل يوم حبنا يقوي ويكبر وشئ هذا نشوف فيه في عينو الأحترام كان بينتنا نتناقشو صحيح بعض نقاشات الممكن تحلي حياتنا وتخرجنا من روتين ليومي في نهار تعب وشقاء وفي ليل يعيشني بين سحاب عسل كلامو سكر حركاتو عبق انفاسو تعطيني طاقة لأستعد ليوم غد لكن أيام لفرح قليلة ساعات لأنسان يحسد روحو يوم حليت لباب بعد مسمعت دقان قوي لحقيقة فرحت وحزنت قليلا أمو قدامي وعينيها متبشرش بخير سلمت عليها دوب محطت حكنكها فوق خدي ودخلت تأفف وينو أحمد

_ يخدم طاطا يروح شوي أخر

_ اممم يخدم وانتي قاعدة نهار كاملة

_علاش قاعدة من شوي دخلت كنت نخدم

_تخدم فاش زادة بقات مستغربة

_ في رستو متاعي مافي بالكش

_ شنوة شنوة وعلي ها لكلمة شعلت فيا ...كيفاه تخدم مع رجال في لمطاعم يفضيحتك يا أحمد مرتك دز مع رجال واقفة كي زوفري

_ صلي علي نبي أمي وسيلة معقول لتقول فيه

_ مانيش امك ومنتشرفش باش نكون أمك لهفتلي وليدي كي نوارة زين وعين وشبوبية مخذك انتي كي مبويا لا تربحك ملي خذيتو حتي جايتو خفت انا امو لروح علي خاطرها من فرنسا ياريتو بقا خذا قورية ولا يخذ وحدة بصغيرها ...

_ بدني لكل يرقل من سم لتنز فيه محبيتش نجاوبها دخلت لبيتي فرغت دم قلبي بالبكاء ...شوي ونسمع في صوت أحمد صوتو وعالي خرجت ودموعي علي خدي نلقي امو فم باب دار وأحمد يدخل فيها موش حابة تدخل

_ شفمة أحمد علاش طاطا لبري

_ علاش لبري وقحرلي قحرة موت

_ أمي صلي علي نبي وأدخل

_ لا مندخلش روح بيا هاو مزال بكري نلقي لوجات

_ علاش طاطا مروحة جيت تو مروحة تو خليك يعيشك

_ خليني بعد معطفت وخليتني وحدي وقتلي ولدك موش هوني ستناه وحدك

_ أنا قتلك هكا أمان مدخلتش وقعدت وهاو صاكك لداخل في لبيت كيفاه صاك دخل وأنت قعدت لبري فهمني فيها

_ نكذب يعني قتلك ياأحمد ياولدي ليزي بصغيرها  لا يزي لسانها ماضي ولاتفهم لا في صول ولاوالو

_ أمي يعيشك ملاك مقصدتش ادخل يعيشك

_ شنوة لمقصدتش ياأحمد تسمع في أمك وصدقتها أنت

_ ملاك أدخل لبيت شوي ونحكو نطر عليا وحكا بنطرة هزيت روحي ودخلت نغلي شوي ونسمع فيه دخلها وهيا تتكرم عليه وساكت أخر كلام خلاني نخرج من سينتي خرجتلو لومي لكل علي راجلي شنوة أحمد علاش مقلتش لأمك لأنا نخدم ولاعيب عندكم في بلادكم

_ أيه يلا عيب عنا مري تخدم في رستورنات مع لعزرة ...تمنيت ولدي يخذها مثقفة بشهايدها

_ محبيتش نسمعها بقيت نخزر راجلي لمنطقش شنوة احمد علاش سكت

_ مواتتش باش نقول ملاك يعيشك تنجم تدخل

_ علاش ندخل شوف طاطا  وسيلة بشهادتي جامعية ومثقفة ... بفلوسي ورزقي وحمدلله وكانك علي خدمتي من سنين شدة رزقي وقفة عليه كيف لعزري وحمدلله لانهار جا شكون قال فيا ربع كلمة ومنقلك كان فما ربي ودخلت وخليتهم

حلقة 27

أم يافا

بت ليلة كاملة نتقلي من كلامها سام لكل مرة تنزو في وذني نعرف احمد ملزوم يسايرها أما كارو وقف في صفي زادة غضتني منو وحملت في قلبي وسكت قمت بالواجب ودخلت طيبت وصنفت كي لحرة مخليت محضرت ...حتي بالكذب محطتوش في فمها كلات شوي غلة قال شنوة متتعشاش في ليل ... ليلتها رقدت في بيت مع ولدي قالت تحب ترقد مع ولدها متوحشتو حتي عبدو مخزرتلوش باطرف عينها وكل شوي تقهرو بكلمة ...بات وليدي يسئل علاش تكرهني قمت صباح حضرت لفطور وحضرت عبدو وهزيتو لمدرسة تعديت لرستو وصيتهم وهبطت سلعة وروحت بعد مقضيت قضيات دخلت لدار لقيتها فايقة تفطر هيا وأحمد صباح لخير

_ صباح لخير ملاك

_ حطيت ساشيات في لكوجينة ورجعت قعدت بحذاهم ....حتي بالكذب مخزرتليش ...

_ وليدي اش تحب نطيبلك

_ متعبش روحك امي منطيبوش تو نجيبو ماكلة حاضرة

_ ضربت علي صدرها وشهقت ...متقوليش عايش علي ماكلة شارع وعلاش ملا مخذ مري

_ لا أمي ملاك طيب ومكلتها بنينة برشا خسارة مذقتش لبارح أما في لغداء نكلو في مطعم ولعشا تجيب هيا مكلتهم بنينة تقول ماكلة دار

_ ياناري علي وليدي لا بورمة طيب ولاباخ يفور في دار ناري عليك راك متوحش كسكسي امك

_ أه كسكسي منقولش عليه لا...لزم نمشي نخدم ليوم ملاك أمي بحذاك

_ باهي أحمد غمزني باش نلحق عليه ....جيت قايمة عملتلي بيدها هز لفطور من فوق طاولة

_ نرفزتني تقول خديمة عندها دخلت لفطور وانا نفغم من لغزول نسمع في أحمد ينادي فيا نسمع فيها تقولو كان تحب نجيك يابابا

_ لا أمي حشتي بملاك خرجت من لكوجينة نشوف فيها تقحرلي هبطت عيني ودخلت لبيت نومي أول مدخلت يدو جبدتني وحضني بقوة ملاك حبيتي توحشتك

_ مانيش حبيتيك حبيت نبعد مخلانيش

_ يعيشك ملاك نعرف الي أنتي  منرفزة اعذرني متعرفش عادتنا أمي مري كبيرة عيب عندهم خدمة لمري في لميدان هذا وزيد وضعيتك صعيب تقبلها

_ مانيش نلوم عليها انا اما تعاملني بأحترام

_ سامحني وبربي لا تخليها تتنرفز حتي لو شراتلك لمشاكل كون خير منها ماني حبك يعيشك

_ باهي احمد

_ نحبك باسني وخرج ...حبيت نلاهي روحي بقيت نظف في دار ونمسح في لغبرة من بعد جيت نطيب في لفطور قاتلي انا باش نطيب حضرتلها كل شئ وبقيت نعاون فيها كانت تؤمر وتتشيف تقول بون عندها وكان نطرة ولكشة سكت أصلا معندي منعمل لاتزيد تتبلي عليا نحملها في روحي ولا نخذل راجلي ...

تعدت ليام كل يوم نقول باش تروح ليوم حتي راجلي معادش لاقية فيه باي لبرتمان صغير في بيت ولدي وبيت نومي وصالون وطبعا مايجيش ترقد في صالون شدت بيت نومي وشدت راجلي معاه وليت متوحشتو وهو معايا ...حتي لبوسة ساعات نسرقوها سرقان ....

نهار قمت بدني لكل يرقل وخواطري دايرة خرجت نرجع للي قلبي طلع من صدري يومتها قومت موخر مفقتش بروحي حتي عبدو توخر كان كيف كلمت عايدة جات هزتو وهيا كل دقيقة تسمعني كلمة في فايقة مع 9 ورجلها مشا من غير فطور في عزري تبات ساهرة للفجاري وتقوم كان مايمشي نهار من ربي فدة تحملت تحملت للي تفلقت عليها عف عليا فك شنوة متحبنيش ماتجيش لداري وحرة في داري نقوم وقت منحب ونمشي وقت منحب فهمت واحمد خذيتو وتحب يطلقني كان نجمت طلقني

_ مك سحرتو ياساحرة ياشمطة انتي يعرسو بيك انتي ودار ولدي نجيها وقت منحب ونقعد قد منحب وراسك قعدة علي قلبك للي تفد وتطلع منها دار

_ شماتة فيك مببصا لهنا ودار منطلع منها كان لقبري فهمت ودخلت سكرت لباب بقوة نبكي وكاني مابكيتش عمري مكنتش نتصورها هكا دوخة زادت عليا هزيت روحي نرجع مري اخري نري في شماتة في عينيها أما عينيها تبدلت وقت لخرجت من دوش وسمعتني نرجع ...كيف خزرتلي بخوف قلبي رف تفكرت موعد الحيض فات من جمعتين ومن همها ومشاكلها نسيت باش نقولو مشيت نرزب لا بدلت دبشي لاحطيت حاجة فوقي هزيت لمفتاح وعلي اقرب صيدلية خذيت تاست وروحت نزرب وأنا ندعي باش ربي ينوالني لفي بالي ...أول مخرجت من دوش دموع معبية خدي دموع فرحة أنو ربي باش ينوالني  صغير علي قريب ...محبيتش نقلها عرفتها موش باش تفرحلي .

حلقة 28

أم يافا

.لفرحة موش سيعتني كنت طايرة في وسط سحابة وردية فراشات تتراقص في صدري ...بقيت نفبري وحدي زعمة أحمد يفرح شنوة باش تكون ردة فعلو ...بقيت نخزر روحي في لمراية هزيت مريولي نخزر لكرشي يعني أشهر وباش يكون عندي بيبي صغير من حبي...حبيبي روح ماما تعرف إلي أنت فرحتي باش تكون فرد من عايلتي غاليا انت وعد نعيشك ملاك ياروح لماما ...لو موش نتوهم كنت حاسا إلي كرشي ترف...لفرحة لفي داخلي موش سيعتني عضيت شفتي وبقيت نخمم في طريقة نقول بيها لأحمد كلمت عايدة فرحتلي قد دنيا بقيت نخمم كيفاه باش نقلو لقيت فكرة طيارة طلبت منها تهز عبدو عندها ليلة مدام ردار في دار شريت لوازم لكل  تعديت هزيت لعشا لكلمت المطعم يحضروه مل عشية وأنا حايصة في لبيت حضرت طاولة صغيرة فيها لعشا فرش ولدي زينتو...بقيت نخزر لكادو وأنا لبسمة فوق شفايفي سمعت صوتو قلبي رف بقوة خزرت روحي في لمراية روب نوار  أجستي علي بدني تحت ركبة ... روج في شفايفي شعري مسيبتو خرجت نزرب نلقاه يحكي مع أمو أول ماشافني حل فمو طاق حتي هوليه أيام مرانيش متأنقة هكا ..

_ أهلا ملوكة لباس

_ اهلا أحمد قربت بستو من خدو بقا مستغرب أول مرة نتجرأ نعمل هكا قدام أمو ...نري فيها تقحرلي ...جبدتو من يدو أحمد تجي لحظة حشتي بيك ممكن

_ أوكي لحظة خزر لأمو شوي ونجي جبدتو من يدو مخليتلهاش لفرصة باش تقول حتي كلمة...من لدخلت للبيت جبدتو حظنتو بوستو بقوة وتكلمت فوق شفايفو توحشتك حمودتي توحشتك برشا

_ روحي أنتي كان تري أنا قداه متوحشك بقا يخزر لبيت شنوه هذا ...

_ حبيت نعمل سهرة مع بعضنا شقولك

_ تنهد حبي نعرف الي الفترة هذي مقصرة معاك شعندي نعمل هاني نلوج علي فيلا تبدي كبيرة وتكفينا لكل

_ حبيبي شديتلو يدو وجبدتو للفرش جبدت لكوفر مديتهولو

_ شنوه هذا

_ حل وشوف

_ أول محل لكوفر وشاف صباط صغير عينيه زغلت خزرلي ودمعتو سبقتو لفي مخي صحيح ملوكتي

_ صحيح روح ملوكتك شديتلو يدو حطيتها علي كرشي يدو ترعش من لفرحة شديتلو وجهو بين يديا باش توالي بو حمودة وباش تكبر عايلتنا باش ينورنا ثمرة حبنا

_ جبدني حضني بقوة نحبك ملاكي نحبك ياأحلي مري في دنيا  يخليك ليا من ليوم معادش تقوم من لفرش أنا نعمل كل شئ باهي

_ حبي متخافش موش أول مرة ليا هذي

_ لا منحبش عسلتي تتعب ماتتحركش باهي روحي فرحان فرحان قد دنيا ربي يفرحك ياأحلي مري

_ فرحان أحمد

_ موش فرحان لفرحة موش سيعتني قلت لأمي

_ لا مقلتش حبيت تكون أنت أول واحد تعرف

_ باهي إيجا نقولو تعرف باش تفرح برشا ..جبدني ولخوف معبي قلبي خايفة تنبزني وطيرلي كيفي وفرحتي ....أول مقالها أحمد وحضنها وشافت لفرحة في عينو حستها لانت باركتلي وسكتت بقات بحذانا شوي ودخلت للبيت رقدت هزني أحمد بين يديه عدينا سهرية لصباح تعشينا شطحنا وأخير رقدنا في فرش بوبلاصة بدن واحد أحلي نومة.. رقدنا مكبشين في بعضنا نتنفسو من بعضا ..

..

حلقة 29

أم يافا

تعدت ليام بين فرح..وشوية تعب من لحبالة أحمد كان هكا هكا بيا وفرحتو كبرت كيف عرف الي لجاينا بنوتة قالي حلمي نجيب بنوتة ونسميها اميرة باش تكون أميرة قلبي ...أمو لانت شوي موش باش نقول برشا ساعات تغزلني وتخليني نبربص نقلنا لدارنا جديدة حتي كيف جات حماتي تروح لحقيقة مخليتهاش نعرف الي هيا وحدانية وأنا كيفها وفرحة راجلي متكمل كان بيها وجنتو تحت ساقيها حاولت قدر الإمكان نخليها تحبني للي بدلتها صورتها من ناحيتي ولحق بعد تعب ولينا كي صفوت لعسل ولات تقدرني وحتي كيف تلقي أحمد يغلط معايا ويعاركني في حاجة تجي في صفي ..ناس فيهم لي تقبل الأمر وفيهم لحد الأن يسمع فيا في لكلام ويحكي من ورايا ويوتوت وانا متعدية كيف مايقولو أرضاء ناس غاية لا تدرك وأنا قررت نرضي روحي ونفرح روحي ليما عاشت في سواد .وفرحت بصغير قد دنيا بقات تقول مجبتش طفلة هاو ربي رزقني بنت أحمد ...جا ليوم لموعود كنت ندادي في بيت من لوجيعة لتمشي وتجي كنت نقول ممكن موش باش نولد تو مزال بكري للي حسيت حاجة طرشقت تحتي وماء سخون هابط علي ساقي صحت بقوة من لفجعة أحمد كان راقد قام كي لملسوع ....تمهمش من لفرحة كيف قتلو باش نولد ...سروال يلبس فيه وهو يرقل من لخوف عليا حتي مريولو لبسو مقلوب ...وصلنا للكلينيك وأنا نصيح من لوجيعة قلبي تقلع وموش هممني لمهم اميرتي تجي لدنيا ..ونكحل عيني بيها ...وأخيرا بعد شقاء وتعب سوايع وأنا نصيح ونسب في أحمد جات أحلي أميرة في دنيا ..محلاها ومبنها تشبه لبوها ...تقول نسخة عليه ....لحمة حمراء صغرونة ...متتخيلوش فرحة أحمد وقت لشدها بين يديه أذنلها في وذنها  كان يكلم فيها بشويةكيف سئلتو قالي أمر بينو وبين أميرتو .....بعد ألم شفت لفرحة ألم طلعان روح من روح ...من لحظتها عرفت إلي متفرحك في دنيا كان روح كيفك الأنسان مايقدرش يعيش وحدو تخلق سيدنا أدم وخلقت منو حواء باش تونسو باش تقف في عضدو وتحميه في حظنها تمسحلو دمعتو لبشر لكلنا ضعيف وأضعفنا الأنسان الوحيد لأنو لوحدة خايبة وتخليك تحس بكائبة في كامل روحك ومن لحظة لمشا عبدو مني وربي حبو عشت في كائبة سنين في دوامة لحزن لشهور ...وربي زاح كربي برزق جديد زوج جديد وروح جديدة دخلت لحياتي زهتها وملاتلي دنيتي ... سعادة وفرحة وبهجة منقول كان الا مالانهاية علي خاطر دنيا موش ديما فرحة ساعات الأحزان يجو باش يفكلك عقدة في داخلك الحزن يخليك تتفكر لخالق وتلتجئلو لحزن ساعات يقوي شخصيتك ويخليك عندك تجارب سعادة حلوة لكن كيف مايقولو الحياة دمعة وأبتسامة باش تتوازن عيشتنا ومنملوش منها ....

نهارات تجري وشهور تسابق في ريح والأعوام كي همس ريح ...كبرت وكبرو صغاري 4 أي نعم من أحمد جبت 3 صغار أميرة وسراج وغسان نوارتي لنورولي حياتي عبدو ليوم كبر ودخل لكلية طب شهور ويتخرج دكتور ويحقق حلم بوه وفرد وقت شادد رزقو لحرصت أنو يبقالو أمانة من بوه ...أحمد سنين عايشين في الأحترام موش باش نقول راني عايشة في لجنة وعمرو ماصارت مشكلة لا تصير مرة وثنين وكل لحظة لكن لحب لفي دخلنا ماتنحاش وكل يوم يكبر حياتي ليوم كيف حياة اي مري تونسية ولا عربية عايشتها برضاء في طاعة ربي وطاعة زوجي وطاعة عقلي زادة علي خاطر في دنيا رودبالك تخلي حد أخر يفكر فيك خوذ قرارك ومايهمك في حد كان في روحك لي منحقها تعيش مرتاحة وسعيدة ومع الأيام حتي لكان غالط ممكن يندم هذا لريتو ولمستو مع الأيام أمي سامحتني وأقتنعت وأخوتي زادة ولينا نمشو ونجو علي بعنضنا وروحهم في أحمد حمدلله حياتي تعدلت ولحزن لكان طاغي عليها أنعدم وسواد لكنت ملحفة بيه روحي نزعتو ولبست لون زهر والأحمر وكل لون بهجة لزم يتلبس لفرح وسعادة بيديك تبينيهم وياتعالي مقامك ياطيحو.... وفات حكايتي وهذي نصيحتي مني ليكم

حلقة 30

أم يافا

نصيحة أم يافا لكل أنثي لكل إمراءة لكل سيدة او مقبلة علي زواج  خوذ قرارك وتعلم عيش حياتك ليك لوحدك مفماش شكون يشيل همك قدك مفماش شكون يضرب عليك قدك لمتفرج فارس يبدع بالحديث وفي أول عتبة يسيبك موش كره باش متقولش بعض ناس كي بو وام وخو مايسلموش فيك اما لبشر بطبعو قلوقي ساعات روحو مايحملهاش خلي يامشاكل ناس خليك واعي ومتفهم الي دنيا مكتوب وأقدار وكل حد قدرو أش عطاه أرضي بنصيب أرضي بلي عطاه ربي... وتعايش معاه وخاصة لو قدر لمراءة كان ترمل ولا طلاق هذاكا ربي شحب نغلبو الأقدار متبكيش وتبقي تندب في حظك علي بعض الاراء ولا كلام تقال في حقك أخرج لنور وقول بالفعل موش بالقول أنا عايشة بقدر رحمان شكونك انتي باش تطفل وتحكي علي أمر خصو ربي عيش حياتك كل يوم بيومها أرضي نفسك قبل مترضي بشر معندو مايضيفلك  طيع خالق  قبل ماطيع مخلوق...أصبر وخلي أملك في ربي كبير أنو ما أصابنا إلا ليختبرنا ومابتلانا إالا ليغفر ذنبنا ...ما أجملها من عبارة نخطئ فيبتلينا فيغفرلنا أنه لغفار جلا جلاله وتكرمت صفاته ...هل تتصور لو اخطئت في بشر سيغفر لك لا باش يهبط عليك بالأحكام وممكن قوانين و إفتعال مشاكل وقذف بالكلام لأنو بشر يخطئ ويصيب فكيف لبشر  يخطئ ويصيب أن يقرر مصيرك مصير إمراءة عانت أبشع المواقف فقد زوج وترمل ولحكم عليها بالإعدام أن تدفن بالحياة من أجل ارضاء عاهات وعقول مريضة قررت أن تلغي شخصية بشر بمجرد تفاهات ..ملاك ثارت وقررت لعصيان وعاشت في كنف سعادة سنوات علاش موش أنت علاش تدفن روحك في بيت وحدك وتقول لا لزم نموت مدام راجلي مات لقصة موش مسئلة رجل فقط لمسئلة حتي خوف من لخروج أًصبحت لأرملة أو لمطلقة في استهداف لو خرجت بسؤال علاش خارجة وين ماشيا لو خدمت كارثة أرملة وحدها الله أعلم وين ماشيا لووقفت مع راجل حتي لو عابر سبيل وسئل سؤال تصبح قليلة حياء كفاكم عبثا وكفاكم تخريفا وسفاهة من أنتم لتحكمو علي بشر مثلكم بالموت بالحياة تحت مسمي عادات وتقاليد بل عاهات وتخاريف لا تجوز لا شرعا ولا دينا ولعيب ان تكون عقولنا خائخة بفكر متصدئ وقلوبنا مليئة بغضا وحسدا والمصيبة الأكبر ان لانهاب الله ولا نخافه في مخلوق مثلنا لا يريد سوي لعيش بكرامة وبسعادة  ....خلاصة لقول لكم انتي الي تقري لو خوك قال باش نعرس بأرملة أو مطلقة علاش ترفض وتقول لا خويا نحبو يعرس بصبية ومايجيش وأنتي أمي لو ولدك جاك وقالك نحب نخذها أرملة ولا مطلقة فاش عيب علاش تقول مايجيش ورتفض قال شنوة موش صبية وبصغيرها ... تربط حياة ولدك بضع قطرات ستمر في لحظات تربط سعادة مري في كلمة تافهه ومسمي كارثي تحت فكر متسخ بجهل الله أعلم منين جبتوه لأنو جدودنا زواج بأرملة مكانش عيب ومايجيش ها لفكر لخايخ دخيل علينا أختراعناه من جهلنا من فكر المنعدم يزو فكرو في سعادة ولادكم وسعادة ناس متبنيش وتهدم ومن بعد تقول ربي حب ومكتوبها موش معانا تشوف أرمل كيفها ولا مطلق هذي  في حد   ذاتها قذف وجريمة يعاقب عليها شرع ...خلاصة القول خوذ قرارتك من غير تدخل أي حد متخليش ظغوط جهل دمرلك حياتك ...متخليش شخص موش عايش معاك في دار يتحكم فيك بطريقة غير ..مباشرة حتي بقول ولا فعل ولا خبر وصلك ولاتحكي قدامك تحت قول كول علي كيفك وألبس علي ذوق ناس "حتي امثالنا غالطة لأنو عمرو مارائي بشر باش يضيفلك ولا يعرف ذوقك ولا ميولاتك ومتخافش من فعل باش تعملو حتي لو اعتبرو لبعض قرار شاذ وأنت خرجت علي سرب وقفت ضد لعاهات ...وضد أقوال بعض لبلهاء لبيعو كان في لكلام

ونتمني تخذو ها لقولة أمل لحياتكم "لو صاحب الأنسان جبريل لن يسلم من قال ومن قيل"

وفات_____________________________________________أم يافا (صابرينا)عمل أرجو أن يستفيدو بيه بعض الأخوات اللي في دخلهم خوف من بناء حياتهم وخوض مغامرة جديدة بعد موت زوج ...

• غرد
• شاركه
• شاركه
• شاركه
• شاركه

YAFFA گرونيـﮯگآت يـﮯآفآ

أتمنى للجميع نزهة طيبة بين سطوري ... فأنا اكتب بشروط الحياة.... صابرين، أتمنى للجميع نزهة طيبة بين سطوري ... فأنا اكتب بشروط الحياة.... صابرين

مقالات قد تهمك